فرانک فريد-ايپک

قادينليغين گير دادی

دوغوم سانجیسييلا بَله شير دويغولاريم

سينيق وار - يوخوم، توربا چيينيمده

اودوب - اودوزدوقلاريمی

ساليب چيخماغا بئش بارماغيم وار

و آلتينجيسی: کئييميش اليم

قادينليغيمين گير دادی آغزيمدا

سرتليک اووجومدا

عطير ايیی بورنومدا

فيت سسی قولاغيمدا

گؤز ببه یيمده آمما

گؤی قورشاغینين بيرله شميش بويالاری

گونش و يئر کوره سی

ات - داش ائله ييره م ايستی – سويوقلوغومو

گونش دوغور

من يوبانميشام.
……………………..

شيرين شهد

تقديم به ملتي که زناني همچون شيرين عبادي را پرورانده است
شيرين عيبادى كيمى قادينلارى يئتيشديره ن ميللته سونولور


سونومدا پيلله – پيلله يول سالديم
و داغلارين زويولداق اتکلريندن
گولله لره قالديرديم کنديمي،
اوسته ليک آياغيندان چکه نلرين ده
آعزيندان چالديم
مني دانانلارين،
دانلايانلارين دا ;
و قولونو داليدان باغلاديم
مني تاباق اوسته ساتانلارين،
بو « شيرين » دادي داماغيمدا ساخلاياجاغام
دامجي- دامجي دامسين آغزيما عؤمور بويو
آخي آجي- آجي شيرينلييه چاتميشام،
سوسوز يئرلرين بيتگيسينين باليدير بو
سسسيزجه بيتيشديرديم
عطيري قوللارينيزي بوغور ايندي
گول چلنگين بوينوما سالين آرتيق،
داها،
آل ياناغيمدان،
بال دوداغيمدان،
قلم قاشيمدان،
شوخ باخيشيمدان،
دئمه يين;
بارماق- بارماق باجارديقلاريمدان
کلمه-کلمه بئجه رديکلريمدن
جيغيرلاردان يول آچديغيمدان
و آلني آچيق چيخديغيمدان
دئيين...
و گول چلنگينى بوينوما سالين !

ايپک (فرانک فريد)- تبريز- 25/7/1381