حميده رئيس‌زاده-سحر خانيم

سحر خانیم

حمیده رئیس­زاده (اردبیل)


1.

آی باجاسی



گئجه­دیر ...

باخیرام آی باجاسیندان

باشقا بیر ماوی گؤیه

اوردا واردیر ائله بیل:

گئجه یوردون قانا دؤنموش دنیزیندن

نئچه بیر غملی بولود

چنلی داغ

قانلی سریود

گئجه­دیر ...

باخیرام آی باجاسیندان

باشقا بیر ماوی گؤیه







2.

یورغون گمیچی­لر گؤزله­ییر منی

قوندار­بئل ایشچی­لر

جاوان ایشچی­لر

یاشاماق حاققیندان پایسیز اورک­لر

اوغوشموش، دایاقسیز سایسیز اورک­لر

حسرت گدیگینده گؤزله­ییر سنی

سنسیزلیک قورخوسو

(نه دئییم آخی)

...

گؤزلریم گؤزله­ییر

قیناما منی...







3.

کؤرپه ال­لرین بارماق­لاریندا

قان قورویاندا.

یاشلی باخیش­لار

دوستاق یولونا باغلی قالاندا.

قورخو ال­لری

قالخان قامته تور توخویاندا

گئنه ده

سنین قارا بالیغین یادیما دوشور...





4.

اوزاق ایل­لر

یاخین گؤیده

مهربان آی یاریسینین دالیسینجا دولاناندا

بالیقلی چای قیراغیندا

بالابان چالینان ایل­لر

آغزیمداکی ساققیز سئوینج

جیبیمده­کی بئش قیرانلیق امنیّتیم

یاری گئجه

اوستومو با­سدیران ال­لر

سیگار ایییلن قاریشان عاطفه­یدی



نه آغزیمدا ساققیزیم وار

نه جیبیمده امنیّتینم

نه محبت اییلی یورغان

چای ایچینده

قان ایچیلیر

میندار قوش­لار دیمدییینده

قاش- قاباقلی

اوزاق گؤیده

آی کیچیلیر



بایقوش اووولتوسو گلیر...







5.

لحظه­لر بوغاناق

ماوی­لر توتقون

لحظه­لر اوزانیب

ایلله­شیر منه

ماوی­لر قارالیر

دان اوزاقلاشیر

دامجی­لار گؤزومده

سئلله­شیر منه

گلسه­م سحر باشی گلَرم دئدین

آخشام دولوخسونوب

اولما گلمه­دین!...





6.

گئجه آغیر

گئجه اوزون

گئجه باخیش­لارا گئییم

فیکره دالیب اؤز- اؤزومه دیله­ییرم:

گلسه گرک اونو دئییم،

بونو دئییم



*

ماوی گؤی­لر چارشاب­لارین آچان زامان

ایکی تاققا

ایکی سالام

دویغو گولو ماراقلانیر

کلمه­لره آداخلانا

اورَییمین چیلغین- چیلغین چیرپینماسی

قویمور سؤزلر دوداقلانا



*

گئجه آغیر

گئجه اوزون

گئجه دویغو­لارا گئییم

نه­یی دئییم؟

نه­یی دئییم؟...







7.

دایانماغا دیوار

نفس چکمه­یه آز-چوخ هاوا

آلیشدیرماغا سیگار

سینه­مین دردین بیتیرمه­یه

داوا وار...

بونلار دئییل دردیم

گونش یئرینه اولدوزلارا کیفایت ائیله­یه بیلردیم

باشیمی چیینیوه قویوب

آغلایا بیلسه­یدیم...







8.

دلی



توزاناقلی دونن­لرده، اؤزلویومو ایتیرمیشم

قارالانمیش یازی­لار تک

زامان یوکو کورَییمده

سانا گلمز آیاق ایزی

آرزی ریزی

حسرت کؤزو اورَییمده

او زامان کی اورَییمین قاپ- باجاسی

عاطفه­لر توفانیندان سینمامیشدی

اولدوزلارا آداخلاندیم

ناغیل دئییب، ماتوشگه­می یاتیرداراق

اولدوز قاشلی اوزویومو گؤرمه­دیلر

آرزی خالچاسین توخویان بارماغیمدا

منی زامان بایداسینا پایلادیلار

دونن­لره

دونن­لرده ایتن­لره

منسیز منی نئیلیردیلر؟

اؤزلویومله آیریلاراق،

باخیش پرده­سینه بوکدوم

اولدوزلارین خاطیره­سین

پارچالانمیش اورییمی

چیلغین بورانلار سووردو

اوزاقلیقلار اؤلکه­سینه

چؤکمز بوران­لار بورودو

گئجه­لر آتوشگه­­سینی

ایراقلیقلار کؤلگه­سینه دالدالاندیم

اولان-قالان دویغولارین ایستی­سیله

دؤزدوم آجی سویوق­لارا

زامان کئچدی، دومان کؤچدو

گؤزوم دوشدو اولدوزلارا

گئری قاییتدیم یئنی­دن

توزاناقلی تاقچالاردان

حسرت اییلی بوقچالاردان

ساری یارپاق باغچالاردان



قاشی دوشموش اوزوگومو،

شیریم-شیریم، آرزولارین خالچالارین،

اورییمین پارچالارین،

اؤزلویومو،

ییغیشدیردیم یولا دوشدوم



صاباحین یولو هارداندیر؟!.





سحر خانیمدان ۶ شعر کیتابی (ماوی لر / یاشیل ماهنی / آیلی باخیش / بیر دسته تزه گونش / حکایت در / دیوان قوسی ) یایینلانمیشدیر.

گومان

بلكه ده گلدين بير گئجه ،
بلكه ده آشدين بير آخشام گؤروش زيروه لرين
بلكه ده دؤيدون يئل بارماقلاريلا سنسيزليك توزونا قويلانميش قاپيمي
بلكه ده دولدون بير گئجه باخيش آينالارينا :يادلانماز بير اؤزلوك كيمي
بلكه ده گلدين اوره ييمه سيغماز بير سئوينجين اينامي تك
دويغو كيمي گؤزلريمدن سوزولوپ گئتمه ييني دوشوندوم
بلكه ده گلدين بير گئجه
بلكه ده ...

داي گل!

حسرت ياش اولوب گٶزلره دولماقدادي، داي گل
گٶز ياشلاري آخماقدا، سئل اولماقدادي، داي گل
هيجران تورو دونياني قفس تك بورويوبدور
دونيا كيمي باغريم دا دارالماقدادي، داي گل
سال داغلارا هاي، گٶيده بولودلار ديله گلسين
يارپاق كيمي وارليق بويو سولماقدادي، داي گل
هيجرينده گئچه ن لحظه لري يانقيلي ساز تك
غم پنجه سي، آه زخمه سي چالماقدادي، داي گل
سنسيزليييه دٶزمك نه سه، ياخين گون اولارميش
دٶزدوم، دٶزوموم جانيمي آلماقدادي، داي گل
گل قوي گونشين بايداسي دونيايا جالانسين
باغريمدا قارانليق ايزي قالماقدادي، داي گل
هر گون سحر آدديملارينين ماهنيسين ايزله ر
آچميش سحر`ين باغري قان اولماقداي، داي گل

Bəlkə də...

Bəlkə də gəldin bir gecə
Bəlkə də aşdın bir axşam
görüş zirvələrini
Bəlkə də döydün yel barmaqları ilə
sənsizlik tozuna quylanmış qapımı
Bəlkə də doldun bir gecə
baxış aynalarıma
yadlanmaz bir özlük kimi
Bəlkə də gəldin
ürəyımə sığmaz bir sevincin
inamıtək
duyğu kimi
gözlərimdən süzülüb
getməyini düşündüm
Bəlkə də gəldin bir gecə
Bəlkə də...
---___---___---
Həmidə Rəiszadə