آلما موغانلي

سن گونش، من آی

سن گونش، من آی
هردن يارييام، هردن ياريدان دا آز
آنجاق سن بوتؤولوكده ياشاييرسان
سن
و يالنيز، سن
گؤيه و يئره نور سپه­لنديريرسن و گوندوزو دوغورسان.
من قارانليق گئجه­نين آز ايشيغين دا سندن آليرام
آمما
من آذربايجان بايراغينين اوستونده اولدوزلا ياشاييرام
و سن
ماوی گؤی­لرده ساپ-ساری قورويوبسان

آی اولدوز

آی، اولدوزلارين اته­يينده اوتورموشدو
يئره باخيب حسرتله دئدی :
كاش اوردا اولايديم

بير قهرمان كيشي دوستاغدا
بير كيچيك آتوشكه­نين آراسيندان گؤيه باخيب دئدی:
كاش اوردا اولايديم

آيي يئره يئتيرديلر
هچ كيمسه اونو باغرينا باسمادی
قاييتماق ايسته­دی

قهرماني دارنان گؤيه اوجالتديلار
آمما... او قاييتماق ايسته­مه­دی

بوش كوچه­لری يالنيز آدديمليرام

بوش كوچه­لری يالنيز آدديمليرام.
قوخوسوز گول­لری آياقلايير، كئچير
كؤنلونده هؤرومجك­لر تور ساليب كيمسه­سيزليكدن
كيمسه­نی تانيمايير
سئومه­يير، نه ده سئويلمه­يير
هر كس اونا باخير
گؤزلری ايشيق­سيز
سؤزلری دويغو­سوز
دوداق­لاری قوپ- قورو

حياتا بير يابانجی گليب
نه حيات اونو تانيير، نه ­ده تانری