Tuesday, March 29, 2005



سحر خانيم





ايرماق

آخما ايرماق٬ من ده سنه يولداشـام
گؤتور مني٬ ائله بيل كي بير داشام

سن داغلارين آغير يوكون چكه رسه ن
بولاقلارين سرين سويون ايچه رسه ن

داش دئييله م٬ يارپاق قده ر يونگوله م
يولون اوسته دوشه ن توزلو بير گوله م

بير دامجييام بولودلاردان ائنميشه م
بير کؤلگه يه م كناريما سينميشه م

آخما ايرماق٬ دايان سنه سؤيله ييم
بودور منيم ايلتيماسيم، ديله ييم

باغلييام من سنين دوغما ائلينه
وئرمه مني آمان دوشمان الينه

قانادينا آليب گزدير هر ياني
گؤتور مني! قانادلارين قورباني

اوردا قيزيل گوللر٬ بوردا قيزيل قان
گون باتميشدير بوردا٬ اوردا آچير دان

يوخسا بوراخ دالغالارا٬ اوزاقلاش
دورما بير آن! كئچ باشيمدان داغلار آش

يا دا مني خزرلره سوروكله
آخيب گئديم باشقا اوزاق کؤيلره

غــزل

سحر خانيم


گل عئشقه اوياق،‌ قـوي بيـزه ديوانـه دئسينلـر
ظولمـت ديلـه‌ يه نلــر، گونــه بيگانــه دئسينلــر

آچ قوللاريني٬ آل منـي نيسگيــل بوداغينــدان
قوي قوينووا، قوي قوينون ايچين لانه دئسينلر

ال سال ساچيمــا، دويغــو دواميلــه تومـــارلا
ايلقــار يـوواسـي جمــع-ى پريشانـه دئسينـلــر

كئفله ن گؤزومون عئشقه اوزالميش باخيشينـدان
قوي گؤزلريمــه خلــق‌آرا مئيخانــه دئسينلـر

ديلدن ديله سال گيزلي باخيشلارداكي شووقو
ائلدن ائله قوي سيرريمي دستانـه دئسينلــر

سيغمـاز ديله ييــن يئلكنـي يئللرده، قانـاد چــال
قوي دوشدو باشي عئشقده طـوفانـه دئسينلـر

دالـمـاقـدادي دالـغـالاري باغـريمـا٬ گَـل قوي
چكـدي سحـر´ي عئشق الـي بيـر يانـه دئسينلـر

-------------------------
يارديم اول ديزلريمه٬ يار كوچه سيندن گئچيره م
يوخلوق آيينه سي يه م٬ وار كوچه سيندن گئچيره م

مني ديلله نديره ن عئشقينده اودور دينديره ن او
من سوكوت ماهنيسي يام٬ تار كوچه سيندن گئچيره م

سحر´ه م هر گئجه بير تازه گونش دسته له ييب
آليرام اووجوما ايثار كوچه سيندن گئچيره م

Labels:

1 Comments:

At 12:28 AM, Blogger Navid said...

آخریه خیلی قشنگ بود!دین دین

 

Post a Comment

<< Home