زهرا نظرنژاد-داملا

...
يالان دانيشسان
تانري اَتيني شيشه تاخار !
اوغرولوق ائتسه ن
تانري اَتيني شيشه تاخار !
عوصيان ائتسه ن
تانري اَتيني شيشه تاخار !
يوخسا تانري
بير منيم اَتيمين آجي‌مييدي ؟
كي ايندي ايسته‌مه‌دن عوصيانا چاتيرام .
شئعر دئييل بونلار
زوققولتو ماهني‌سيدير آغرييلاريمين .
دينله گوجون وارسا
من بؤيله ياشاميشام آنا !
اونوت دئدييين
ياشاماديغيم آرزولارا نيسگيل‌له نمه‌ميشه م
و ياشاميمي ايتيرميشه م
ايتگين اوره‌ييمين واراقلارينين اورتاسيندا
من بؤيله ياشاميشام آنا !
دوداقلارينين بيتمه ز هوسيندن
اييره ندييم دونيايا اؤپوش اؤيره تميشه م
بؤيله ياشاميشام آنا !
بير تيكه چؤره‌يه مين تندير قابار ...
دئ بونلارين حئسابيني كيمه سوروم ؟
من كيمين اَتيني شيشه تاخا بيله‌ره م ؟
كيميني ساللاغا چكه‌بيله‌ره م ؟
هله‌ليك
اؤزوم ـ اؤزومه داراشميشام
من
ان ويجدانلي‌سي
اؤنجه اؤزومه داراشميشام
و سونرا
سونراسي دا سنده آنا
آنا !
آماندير
ديرناقلاريني چئينه‌مه
بير گئجه‌ليك چؤره‌ييم آز گله ر بيردن
و ساساديغيم زامان
شاهداماريني دوداقلاريما باغيشلا سن
آنا لوطفن ...
من بونلارين حئسابيني كيمه سوروم ؟
تانرينين ديلي يوخ ،
يالنيز سسسيز بير كؤتك آغاجي وار
دونيا ايسه ويجدان‌سيز بير قضاوت‌چي
من بونلارين حئسابيني كيمه سوروم ؟