Thursday, December 03, 2009



اولكه ر اوجقار- منيره اكبرپوران









خیضر

تبريزين کوچه لريني گؤرسيدين

منه داريخما دئمزدين

دايان دئمزدين.

سحرلر

قيرخ ايل اولار قيرخ گون سحر،

قاپيني سوپورور قونشونون قيزي

سحرلر ائله " گل آپار قورتاردي" چيغيرير تاباقچيلار

ال گيرير اوره یيمه!

يئر اوزوندن اوزوله سي هر نه وار دئيه سن!

آخشاملار خط ماشينلاريندا قاريلار آداقلييام دئينده اينانمير.

آخشاملار خط ماشينلاريندا

بويلو قادينلارا يئر وئرمگيم گلمير.

" نئچه اوشاغین وار؟"

خط ماشينلاريندا آخشاملار.

گئجه لر سه آياق سسي گلنده سوستالير آياغيم.

آچار يئريندن گؤرونن ايکي کؤلگه بيرلشير،آيريلير

بيرلشير،آيريلير

بيرلشير...

يوخويا قالسا قونشونون قيزي

بو صاباح دا خیضري گؤرمه یه جک!

---------------------------
Buğdalar
Əkinçini buğdalar ayaqqablarından tanıyar
Çömbələndə alaqlasın otları,
buğdalar kimi təkcə kürklü börkü görünər.
Bəlkədə çiyninə yetişsin deyə
Buğdalar bir ildə bir belə boy atar
Bir belə böyüyər!
Əkinçini buğdalar
ayaqqablarının dalısını yatıtsa da tanıyar
əkinçini buğdalar
ayaqqablarını çamura- palçığa bulasa da tanıyar...

Biçinçini...
Biçinçini...
hadı buğdalar təkcə ayaqqablarını görər
Buğdalar təkcə ayaqqabların tanıyar!
-----------------------------
او آرادا بیر گؤز­للشمیشدیم








او آرادا بیر گؤز­للشمیشدیم

آنام یانینا سالیب، توی‌لارا آپاریردی

اؤیونه-اؤیونه قاپی‌لاردان کئچیردیک، ایکی محتشم قادین!

آنام ساری بیر قیز ایمیش

ساری سوسار دئیردی قونشولاری

دانلایاردی آجیقلاناندا ننه‌م: "جمالی دا یوخدو

آللاهدان اؤتور ائوی ییخیلمیشین باری"

قالدی قالدی اوتوز یاشیندا بیردن گؤز­للشدی

توی گئجه‌سی آتامین اوره‌­ییندن کئچنده غریب گؤزل قیز!

گئت-گئده گؤز­للشدی

ساچ‌لارینا دن دوشدو ده گؤزللشدی

قیپ-قیرمیزی خینا قویدو ساچ‌لارینا گؤزللشدی

گؤزللشدی

گؤزللشدی

...

من ده او آرالاردا بیر گؤزللشمیشدیم

ایندیسه ساری بیر قیزام!


87
----------------------------
سئو منی

سئو منی بو گئجه،بیر تک بو گئجه

سئو! سنی تانریمیز سئو منی یئنه!

قوی بیر ده گؤزلریم اوخوسون سنی

قوی بیرده قوللاریم سارماشسین سنه






ایندی چیچکله‌نیر گئجیکن یازلار

بیلدیرین قاری‌دیر بو گئجه یاغیر

قولاق وئر بیزیمدیر بو قارا شنلیک

آلان‌لاردا یاس‌دیر داغدا چال- چاغیر






تانری ایستمه دی قضا قویمادی

سئو، سئوک قوی گؤرسون قیسیر اولدوزلار

سئو قوی سنین اولسون منیم سون سوچوم

قورتولار بو گئجه آرزیمیز قالار






گئجیکیب گونوموز،گئجیکیب سؤزوم

من گوزون اییینی گئج آنلامیشام

قوی منی قوللارین توتوب ساخلاسین

بو گئجه یارپاغام،یئلم،یاغیشام






قوی ایستی اللرین اریتسین منی

اولوکی آلیشیب یاندی جانیمیز

یا دلی دومرولـله سئوگیلیسی تک

تانرینی قایتاردیق بو حؤکموندن بیز






قوی منی اللرین توخوسون سنه

سئو منی! دونیانین سون گئجه‌سی‌دیر.

سئو منی بو صاباح یئر قوووشاجاق

بو یئللر یئر- گؤیون سون نفسی‌دیر

86/7/14
----------------------
سردابامیز!





یئرین اوزونده نه‌لر اوْلورسا

تانری گؤره‌جک

اؤزوده گؤرمه‌سه بیردن،

اوْبئله ملکدن بیری گؤروب،

گئدیب دئیه جک...



ننه‌مین ساندیغیندان اوْغورلادیغیم لاواشالاری

سردابامیزدا گه‌میره‌ردیم من

بیر توْراتان‌لار بیلردیلر

بیر ده نئجه بیر اوْلسایدی ننه‌م



دونیانین دیل ـ دوداق قاماشدیران دادینی

آی اوغلان،

یاخشی بیلیرم!

حئییف کی آتام وئردی دولدوردولار سردابامیزی!

87.12
--------------------------
تتیک


دالی سالیرام هرنه‌یی

دالی سالیرام

تتییه اؤیرنیب یوخسا بارماغیم

قوی سنه بو قویودان بیر ده سو چکیم
کندیرسیز

وئدره‌سیز
سوسوز

قویوسوز!
--------------------------
قوزوم


قوربانلیغا سئچیله جک قویون

گئجه سی،

پیچاق گؤرر یوخودا


سن سه

گؤزلرینی آرخایینجا یوم

یوم یات قوزوم

آداملار نه سه گؤرمزلر!


88/6/26
------------------------------
یولداشی...



آغزیمداکی بلله نی اودمادان ایکینجیسنی توتاردی آنام:

" تئز یئ یولداشینین یانینا گئت سین! "

2-3 یاشیمدا قویروقسوز بیر بالیق چکیردیم

تئز ال یئتیردی یانیندا بیر گؤزلین چکدی

چؤهرایی بیر گول ده تاخدی تئلللرینه:

"بو یانیندا اوزن ده یولداشی!"

همن ده ائولر، آغاجلار

همن ده شهر

بو اؤزو، بو چؤهرایی دون دا یانیندا یولداشی

بو اؤزو، بو چؤهرایی پاپیون دا یانیندا یولداشی

همن ده بو سن:

بو سئودیییم اوغلان

بو چؤهرایی پالتو گئیه ن

یانیندا یولداشی!

87.12.3
----------------------------
و "بی ریا" هله ده...



"ائله چیرپیلیر اوره ییم ائله چیرپیلیر...

گؤزلریم گؤزلرینه ساتاشاندا..." دئییرسن،
پارپار پاریلداییر ببکلرین

سانکی بو کلمه لری سن یاراتمیشسان

سانکی کؤکسونون

_او سئوینجک کؤکسونون_
یئرینی ایندی تاپمیشسان.

صلیبی ساواشلاردان اؤیونه- اؤیونه


یوردونا دؤنن قارامان اییید!


" ائله چیرپیلیر دئییرسن، الین اوره یینین باشیندا

آل بایراغینی قالدیران اییید!


من ایسه،


کؤکسومده

عیدده لری چیخمایان قیزلار


جاهاز بوخچالاریندان

قارا دونلارینی

چیخاردیب الده قویورلار.

و "بی ریا " هله ده،

او آدسیز قبیرلرین باشیندا
قران اوخویور.
-------------------------


Labels:

1 Comments:

At 8:49 PM, Blogger mehran bahari said...

اوشاقليغيمدا خيديرلا تانيشميشديم. خيدير نبي بايراملاريندا، آنجاق هئچ واخت اونو تانيياماميشديم. تا كي بؤيويونجه و قيزيلباش اينانجينين گيزه مله ريني اؤيره نينجه. بيزيم اورادا هله ده تورك قيزيلباشلار خيدير نبيني گؤزله له ر، آنيسينا و آدينا خيدير نبي بايراميني قوتلارلار. توركييه-بالكانلاردا ايسه تورك اولسون ويا اولماسين هامي ائدئرائلله زي (خيضير ايلياسيس) بايرام ائده رله ر. سيزين بو قوشوغونوز بير يول داها خيديري خاطيرلاتدي منه، دوغروسو اونو سيزين وئبلاقدا بولابيله جه ييمي هئچ سانمازديم.

بو شئعري قادينجا وئبلاقيمدا يايينلاديم.

 

Post a Comment

<< Home