Saturday, December 12, 2009



شیدا نونهال - خزر





داش توفنگ ساواشلارينين

زيرناچي سييام ايندي،

گور هارالارا چكدين مني،،،

شهرين پارتلاق اوره يينه،

قارانليقين قوجاغيندا

سيخديردين مني ،اي ي ي

ايكي اوزلوم...

ياناقلارين قاداسي

سني اوپمه يه جه يم دا،

آياقلارلا سيغاللاتديرديغين

گوونجيم ايدي ،دادليم،

دووارلاريني قالديران دان بري،،،

تانري آختاريرام

ايچيمده

رومانتيك گوروشده

يئسير - يئسير.


------------------
آرزی


ایللر دی کی گولوش لری ،

باخیش_باخیش ،

سئوینج لری اوره ک _اوره ک ،

اوغرون_اوغرون،گوزیاشیلا،

یار هوسین دینله یه ره ک ،

قوزئیلره گونده ر میشم !

*قوجا فلک تانیر منی ،

چیله نمیشم گولوشونه ،

یاغیش کیمی

چیر پیلمیشام آیاغینا

توو _تله سیک ،

کولک کیمی !

سنسیز لییه سور گون دو شن ،

اوره ییمین باغلی الی،

دویون له ییر دیلک سازین ،

قیریق تئلین !

اوره ییمین سارا ییندا ،

ساچین هورور نفسلرین ،

عطرین دورور ،دورا جا قدیر ،

اوره ییمین سارا ییندا ،

چالاجاقدیر ائل عا شیغی ،

خان چوبا نی

اوینایا جا ق

یابا نجی لار آجیغینا ،

قاوال رقصین !

ان ابدی حسر تیمین ،

نه اول دو سون اونوت دئیه،

اوره ییم له ،

اوینا یاجاق

قو جاقلا شان آر زی لاریم!

--------------------
آتا






سیلدیریم باخيشلا، سوزلو باخيشلا

آيريلدي باغريمدان بولودا میندی

گورمه دي آردينجا آرزيلاريمي

بيلمه دي آغلايان گوزلر كيميندي



گورمه دي كونلومده سالديغي ايزي

سئوينجك- ترتميز اوتدو گوزومدن

چالخاندی حسرتین شوران دنیزی

آستاجا سوزولدو اوپدو اوزومده ن



ايسته ديم ياشايام اوره يينده هي...

هاوا تك يئر سالام تر نفسينده

قوشولوب چاغلایان سئوگینله، کاش! ای...

یوکسه له م گویلره، یاغلی سسینده





ندنسه گورمه ديم سني دوْيونجا!

ياغيشلي، چيچكلي، ياشيل ياز كيمي

قيزغين اوره ييمده سني دو‌ُيونجا

سوكورم گئجه ني، دان- آياز كيمي



ياغدي وارليغيما قارانليق ، آجي

سنلی گونلريمين تك ايزي قالدي

قوپاردي طوفانلار كوكلو آغاجي

دالينجا مه له ين بير قوزو قالدي



قيسقاندي گوزومه ملك لر سني

چيينلر اوستونده گئدن آنيندا

آرخانجا كوكره ييب بير سورونمه ديم

بنوشم ، يارپيزيم ، خزان چاغيندا



او گوندن بسله نيب بيرقالين قادا

كونلومون گوزونده ايت ديرسگي تك

سئويمليم، سئومیشم، سئويرم سني

اينسانين چاتيشماز، بیر ديلگي تك

---------------------
اينتيظار



"


حسرتین چکیره م، حسرتین هر آن
سانکی خوش یوخومدا، گورموشم اینان


............................................


دویموشام گلیشین، نازلی دلبرین!
آغ دوندا گورکمی، نور چیله ندیره
آچاراق سیرریلی، سینه دفترین
دویونه ن اوره ئی، پرپیله ندیره!


....................................


نرگیزلی قوخولو، گه ل آی بنوشه م
آیرلیق اودونا، یوخدو طاقتیم!
جننت ین لذذتین سنده بیلمیشم
باشقا باغ-چمنه یوخدو رغبتیم!


.....................................


هر جمعه نغمه میز قه هره دوندو
آناملا – آتامین، قنوتلاریندا
گون باتدی یئر اؤزو کد ره دوندو
باخیشلار آسیلدی بولوتلاریندا


................................


بو حسرت بو هجران گویو چالغالار
اينامسيزسئوگی لر،یاری کوسدوره ر
کوکسومده " خزه ر " تک چیرپیر دالغالار
یاری باریشدیرار، یاری کوسدوره ر ..


.................................................



حسرتین چکیره م، حسرتین هر آن *
سانکی خوش یوخومدا، گورموشم اینان *

دویموشام گلیشین، نازلی دلبرین *
آچاراق سیرریلی، سینه دفترین *
آچاراق سیرریلی، سینه دفترین *


............................................
----------------
داغلار،،،




سلام عزيز وحورمتلي دوسلاريم

گئجيكدييم اوچون عوذور ديله ييرم، بيلميرم ندنسه وبلاگ يازماقا داها ماراقلانميرام، آمما بعضي عزيز وسئويملي دوسلارين ايسته ديك لرينه گوزوم اوسته دئييب، ويئنيلشمه يه بير قديمي دوردلوك ايتحاف ائديرم بو شعري تام اوخوجولارينا،،،،،،،،،،،،،،، ديرلي باخيشلارينيزي گوزله ييرم يارديم ائدين...





سن گئدلي بوردان اوزاق ائللره

سوزلريمي من دئيه رم داغلارا

سئوگي غمين هر كيم دئسه آز دئيير

من قالارام داغلاريمي داغلارا



دوداغيملا پيچيلداشان آدين دير

چيلغينليغا سبب،شيرين داديندير

خاياليمدا تكجه سنين يادين دير

آپارمني سنلي ياشيل باغلارا



من دنيزلر ايتگيني، سن ماياق سان

عومور يولون گئتمه يه سن آياق سان

دوست ـ دوشمانلارايچره منه داياق سان

قالدير مني؛ سالما بو آلچاقلارا !



دويانماديم باخيشيني دويونجا

دايانمادين قنيم گوزون اويونجا

كيپريكيمي كيپريك اوسته قويونجا

قاييت گولوم قاييت بو يايلاقلارا



سسله نه رم داغلار داغلار آداغلار

قوچاقلاردان سوز آچارام ائل آغلار

كوكسوم يانار ،داغلار يارامي باغلار

قوربان اولوم عيصمتلي تورپاقلارا !



---------------------
((. . . سنـــــی ))






اینلــه یـه ن، اوزانـام تئللــی سـازیمسـان

سینه مده، دوز کیمی! یـالارام سنـــی!!

سوئیکه سن چاناغین كوئیره ک اوره گه

دوبيتي اوستونده ،چـالارام سنــی!!

.......................................................

قـارانليــق چـوکــوبـدور، آليـــن يازيمــا

پاييـزیــن دوشـوبـدور، ياشيـل يـازيمــا

گه ل باخما، سینه مده، چارپاز یازیما

قئیمیـــرام! قهـــــره، سـالارام سنــي!!

................................................

هـــر كيميـن دردینـی، اوز ائلـي بيله ر

دلــی نیـن دردینـی، تک دلـــی بیلــه ر

بیـــر دامـلا قـدرینــی، یارالــی بیله ر

تـامـارزي دوداغــا! جـالارام سنـــي!!

...................................................

هـارداسـان الینـه، الیـــم یئتیشمیــــر

آرزی حیات بویو، دولمور، بیتیشمیر

دئمه!: پاک سئوگینه، واریم چاتیشمیر

عـومـور بـاهـاسینـا، آلارام سنـــــی!!

.....................................................

سن منیم سوزوم سن، نغمه م آوازیم

ائلیمسـن، دیلیـم سـن، گــرایلی یازیم

"خزره" م، آی تئللی، صدفلی سازیم!!

هؤوروک،تــک! بوینوما، دوولارام سنی!!

....................................................
----------------------
آذربايجانسيز






فلکیــن چـرخـــی آمـان، گـؤرنـه آمانسیـز دولانیــر!

سـورونـور ثانییه لــر، ایل بـویـو سانسیـز دولانیــر!

مجنون عاشیـق لیک ئیلــن گـؤرنـه گـزیـر چول باییری

لیلــی ـ لیلــی دئیه رک، وصلـه گومانسیز دولانیـر!

کعبـه لـــردن داها! یارب سســی گلمیــــر قولاغا

بیلمیــرم سئوگـی نیه !؟ ایندی ایمانسیـز دولانیـر!

قورددومانلیق سئوه ر اینسان اتینی دادماق اوچون

داهـایوخ! قـورخوسـو، قوردلاردا دومـانسیـزدولانیـر!

کیمســه یـوخـدور قـوزونـو دؤنـده ره اؤز یـایـلاقینـا

ســورویالچیــن قایادا، گــؤرنه چوبانسیز دولانیـــر!

آذري اولكــه سينين، هــر سويونون،اوز طامــي وار

باغليدير "جان"لار اونا، ســن دئمه! جانسيزدولانير!

آرازیــم؛ آخ آرازیــم! کـــْرلا قونوش، دول "خـــزر ه"

بيــزه نه!؟باشقا ائليـن، آرخــي نشانسيز دولانير!

---------------------
شكيل






بیر پاییزگئجه سی...

یارپاقلار ،

اوپوشورلر

ومن...

سئوینمه سین آیریلیق


الیمده کی شکیلینی

اوپمو رم.

-------------------
نيسگيللي دويون







تمیز دویغولو گئجه


اولدوز بایراغی ساچیلیب

دوغولمادادیر بیر سنلی توی قایغی سی

گوزلریم ایشیقلار اویناغی

سئوینج اوجاغی . . .

دیلیم شور ماهنیلی

و سن . . .

بیلمه دن آلینیرام ! ! !

اوره ییم اسیر،

آغیر بیر حیس ایچینه چکیر

منی،

خینوو لی ایت دیرسه گی موچورلانیر

اوره ییمین گوزونده!!

اوزاقلاردان روح کوئیره لده ن اوزان سسی،

دیلغمی، یانیق کرمی، اینجه گولو،

یالنیز آغیر هاوالار،

یاخینلاشدیم سنه

وقاداقلاندیم،

حیــــران . . . !! حیــــــران. . .!!

توی گئییمینده یوخ!

ملک اوخشارلی؛ آغ یاراشیقدا تاپدیم سنی!

سس سیزـ سمیر سیز

خزان چاغیندا سنلییم باهاریم،

دونموش نفسین ایسیندیرمه دی هئچ.

سئوینج . . .

دویونتولریمین سمفونی سین دونده ریب!

آغی مارشی سینی باشلادی.

سویودو او قیزغینلیق !!!

دولدو . . . و . . . اولدو . . .

گوزوم سنسیزلیک چاناغی،

و . . . .

ابدی نیسگیل بولاغی

دیلیم ایسه سارا ماهنیلی

و

سن. . .

-----------------------
قالارگي حسرت






سیغینار بنوشم، چوله ـ چمنه !

هارداسان دایاغیم؟ دایانام،یئنه!

ایللردی ایچیمدن سوروشورام هئی...

ابدی حسرتیم نه اولدو سنه؟



کونلومون پرده سی سنسیز داریخیر!

کوچه لر ماهنیسی ، ایچیمده آخیر!

گوزوم دویغولارین اله ییب،باخیر،

توکنمز محنتیم، نه اولدوسنه؟



ایزله اوره ییمی، ایلدیریم چاخیر

سونسوز آرزیلاریم کوکسومو یاخیر

سن منه بیر پای سان، بیر آتیم چاخیر

قوجالماز نییتیم،نه اولدو سنه؟



آجیلار ایچیمی ائشه، یئری وار

حسرتین باغریمی دئشه، یئری وار

گلیشین کولگه سی دوشه، یئری وار

شربتیم، صحبتیم،نه اولدو سنه؟



بير اوزان کیمی یم، سازا باغليام

شاه پرده لي او شاهنازا باغليام

ماوي خزر، کور آرازا باغلييام

سه گاهيم، باياتيم نه اولدو سنه؟

--------------------
وارليغيم






شکیلینه

دولدوغوم آن،

اوزومه چوکورم

اوزومدن!

ایچیمده دوغولورسان

یالنیزلیق دویغوسون

دویدوغوم آن،

ائشیدیرم

سنی......

ودویورام

سسینی.......

آل سسین ،

نه دئمک ؟

آغی

یاغدیریر

باغریما

و قار

چیله ندیریر

یارپیز قوخولو

وارلیغیما،،،

ایندی ایسه

تامسینیرام،،،

. . .

ان آجی بیر داد،،،

. . .

سنسیزلییی،

سوُسوُر

گوزلو باخیشلاریم

سوُسوُر؛؛

و ان ذیروه لردن

حزین سسین پیچیلداییر

سوس، خزریم،

سوس،،،،،،،،،

----------------
سئوگی،،،




گوزلریم تیکیلیب چنلی یوللارا

کونلومدن یار غمین آتا بیلمیرم،

یاخیندا بیر ایستک بیر آتدیم آرا

نه قده ر قاچیرام چاتا بیلمیرم،



سئوگیلیم دردینه دایانماق چتین،

خاطیرن ایچیمده قان کیمی آخیر

گوزومون بولودوگورنئجه چیسکین !

آرخانجا اله ییر، آرخانجا باخیر



خایاللار گویونده سنله اوچایدیم

سورغولار،سورغولار،یئنه سورغولار

سوراردیم، سئوگینی تانیماسایدیم!

آیریلیقدان آسان حایاتدا نه وار؟



بیلیرم کی بیر گون ندنسه، هاردا

حسرتین گوده می اوتوب، ازجک!

بیلیرم دونیانی من دولانسامدا

گوزلریم هر یاندا سنی گزجک!





آیریلان گونونو یادا سالیرام،

آجیلار بویلانیر آندیریر منی

یئنه آیریلمامیش سنه دالیرام!

سنسیزلیک آلو تک یاندیریر منی.
-----------------
آغرین آلیم












سارماشیق گوللری تک، گه ل ساریشاق، آغرین آلیم



باشقا بیتگی اوره ییم ایچره آلاق، آغرین آلیم



گه ل کؤک ائیله سازیمین تئللرینی دیلغمی یه



نییه بو چال چاغیریم اولدو یاساق؟ آغرین آلیم



امی رم من آجی دردی سود امرلر سایاغی،



آتما ایلهام پریمه سن بادالاق، آغرین آلیم



سوپورور یوللارینی هر گئجه یاتماز خایالیم،



یاردیم اول هیجرانی بیچ، الده اوراق، آغرین آلیم



آی گونش بویلو! خایالیمدا یاتیب، مورگوله ین



دالغینام، بیر باخیم اول گوزده قوناق،آغرین آلیم



جومورام گنج لییمه مین کره سنلن قووشام



قوجالیق ،منله اولور باغری باداق، آغرین آلیم



سنلی اوکیاندا سینار یئلکنی چوخ لوتگه لرین



لئمانیمدان آسیرام، ایزله مایاق، آغرین آلیم



هر دنیز تک خزرین سینه سی اوسته گمی لر




دولو سئوگی داشییار،فیت چالاراق، آغرین آلیم







تشککوروممنونیت له

خزر

-------------------------
مظلوم خالقلارا اتحاف





مظلوم خالقلارا اتحاف


هرگئجه نین آرخاسیندا سحروار

هرسحرین وارلیغیندا خبر وار

هرخبرده قایغیمیز بیر طهر وار

بونه دویغو، بونه قایغی ،نه حالدیر

بونه هایدیر،بونه هارای، نه قالدیر



اودوملو یول دادلیم یولداشسیز اولماز

ائو دیله مک قارداش ساواشسیز اولماز

قودوز قوغماق اتکی داشسیز اولماز

هانسی ائلده بئلنچی چالهاچالدیر ؟

بونه هایدیر بونه هارای نه قالدیر



اومید وارسا ظالیم یئنر گورشسیز

نه آنلامی وار گوندوزون گونشسیز

دنیز گرک چورسوز ،چوپسوز ،کولشسیز

کیم می دئدی سیزین ائله کی لالدیر

بونه هایدیر، بونه هارای نه قالدیر



سنین یئرین ذیروه لر دیر قارتالیم

اوچ گویله ره یوکسل آی آغرین آلیم

گویلو گونون خوشدور شیرینیم بالیم

بوگون دیلک بیر گوی دولو قارتالدیر

بونه هایدیر، بونه هارای ، نه قالدیر



سوس خزریم قوی سوووشسون بو قادا

نه ائلی وار نه آدی وار آرادا

اومحکومدور هله بوگون مین آدا

ابدی لیک بوسوسقونلوق ماحالدیر

بونه هایدیر ،بونه هارای ،نه قالدیر .

-------------------------
کوچه نیز دن اؤتورم





کوچه نیز دن اؤتورم یار، یئنه منسیز دن اوتور


آمما بیر قوشدا گلیب،اؤتمه دی سنسیز دن اوتور

قاپانیر ساگوزومون چکدیگی یول لار، باخیرام

گزیرم هر یانی دیل ـ دیل هله هنسیز دن اوتور

ده یریم وار سا قبول ائت سیغینیم قوینونا یار

سن کیمی بیر وطن اولماز بو وطنسیز دن اوتور

درده باخ، نیسگیله باخ، ائللر او چون اولدوم ده

بیر جه گوز دولمادی یاشلابو کفنسیز دن اوتور

قوی بو یاز -یای سنه قالسین قیشیمی وئر گئدیرم

بیر اووج بوغدادا آخ، یوخدو بو دنسیز دن اوتور




Labels:

0 Comments:

Post a Comment

<< Home