نازلي خاكپور

گئجه دير ، باخ گئجه دير
آراز`ين باغري دونوب
بوروموش قار شهه رين هر بوجاغين
اولدوزون قارقاسي ، قارقا اؤلومون -
ماهنيسيني ،
آراز`ين قان نفسينده بورولان دالغالارا -
اوخشاما سؤيلور
قارا بير كؤرپه باليق سويوقون شاختاسي ، -
چيينينده سويون تركينه جومدو
آراز`ين شيلتاغي هؤندور
ائله بيل گؤزلري يولدا
قارا جومماق سسي يان يؤوره ده قالخير
آياغي قاردا جومور بير ايگيدين
گلير اؤلسون
نئجه دير.
گئجه دير باخ گئجه دير ،
بير بورولغان آراز´ين باغريني بورخور
صمد´ين رددي قار اوسته
رددي ايچره قارا بير كؤرپه باليق شاختا -
سويوقدا بوغولور
صمد اؤلدو آراز ايچره
كؤرپه بير قان دوغولور .

آردي-Ardı

رقيه امامي-آشقين

وطن‌ سئوگيسي‌

ايسته‌، سنه‌ وئريله ‌جك‌، سئوينج‌
آختار، تاپاجاق‌سان‌، يارديم‌ ائده‌ ن‌
دانيش‌، دينله ‌يه ن‌ اولاجاق‌ سسي‌نه‌
آل‌ گيله ن‌، وئره‌ن‌ اولاجاق‌، سئوگي‌سين‌
سئو، آنلاياجاقلار دويغولاريني‌
باغير، سس‌ وئره ‌ن‌ اولار سسيوه‌
ال‌ اوزاد، توتان‌ اولار اللريوي‌
قاچ‌، يارديم‌ ائده ‌جك‌ آياقلارين‌
بير آز صبر ائيله‌، آچيلاجاق‌ ديلين‌
باغيراجاق‌سان‌ داغلاردا:
كي‌، سئويره ‌م‌ وطني‌، بونو بيلين‌.

رقيه امامي آشقين

آردي-Ardı

سئودا خانيم

تبريزلي شاعير و عاشيق "سئودا" خانيم`دان ايكى شئعر

چوخ باش آچيق آياق يالين گؤرموشه م
داراييبان قارا ساچـــين هؤرمــوشه م
كده رله نيب آغـــلاميشام، گولموشه م
خــــلق اولدون شؤهرتــه سن٫ آدا، دونيا

قانلي گؤزياشييلا آغلار قويوبسان
داغلارييـــــلا اوره كلري سويوبسان
وفان يوخدور٫ اؤز ائليندن دويوبسان
يانــــديردين اينساني سن اودا، دونيا

ازه ل آل ائيـــله ييب گولـدون اينسانـا
قــوجاغيندا گزيب سولدون سـن آنا
اوزون گولدورمه دين٫ گتيردين جانا
دوغرودان ده يمه ز سن هئچ زادا، دونيا

سئـودا چكيب آه-و زاري آغلاييـب
اوره يــينــي ائـــللرينــه باغلاييـب
هيجران اودو سينه سيني داغلايـيـب
سن دوشدون بير گونده مين مودا، دونيا

٭٭٭٭٭٭٭٭٭٭

ائولادين بختييار٫ اؤزون بـــختييار
ايسته كلي ساييلدين آنادان وطن
پارلاق اولدوز كيمي گؤيه اوجالدين
جان دئميشه م ازل بينادان وطن

شرفله ياشاييب اوغلانين٫ قيزين
اوره كلرده گزير تاريخين٫ ايزين
قـــهرمان آدلانان آنا تـــبريــز´ين
قدريني نه بيلير اونودان وطن

سئودا اوره ييندن ايسته يير سني
يارالي قلبينده بسله يير سني
هركس كي ناداندير پيسله يير سني
اونا قارانليق اول منه دان، وطن!

٭٭٭٭٭٭٭٭٭٭

آي حضرات! چاره قيلين درديمه
مني آتيب كنار٫ جانانيم گئتدي
قلبيمي قلبينه باغلايانماديم
جان دئييب اوره كدن يانانيم گئتدي

اسيرگه دي عئشقي٫ دؤندو ايلقاري
گؤزياشيمي اوزومده ائيله دي جاري
قالمادي ازه ل كي عئشقين آثاري
اوره كده درديمي قانانيم گئتدي

سئودايام٫ سئودالي اولدوم دونيادا
چكديييم زحمتلر گئديرلر بادا
يار منيم كؤنلومو وئريبدير يادا
ايلقار وئريب ايلقار دانانيم گئتدي

آردي-Ardı

لئيلا حيدري

«ياريم گئديب»

ياريم گئديب منه خبر وئرمه ييب
گئده ن گونوندن خبري گلمه ييب
نه گلدي اوْ گؤزه ل يارين باشينا
باشلار اوْلا قوربان اوْنون قاشينا
اوره ييمي داغلايارام من نئجه
گؤز ياشي گؤزدن اله ره م هر گئجه
من اوْخورام ساغليغينا «و ان يكاد»
غملري آللاه اوره يينده چيخاد
اوْنا دئيين منيم گونوم قارادي
گئده ن گونوندن اوره ييم يارادي
ائي منيم او روح-و روانيم جانيم
آي قادان آليم باشينا دولانيم
من بئله حالسيزليغيني گؤرمه ييم
ايينه اوجو غمليييني گؤرمه ييم

آردي-Ardı

زهرا احمدي-دنيز

«باغيشلا مني»

آيدان آري سودان دورو ، گؤزه ل آنا!
باغيشلا مني ، باغيشلا
زامان دؤنگه لرينده
يوبانديم يئنه
سن ايله گؤروشو
گله جك صاباحا ساخلاديم هله
اينجه دويغولاريمدا تله سيره م اؤپوشه
آخي من ده بير آنايام ، بير آنا
بو «من» سنسيز سئوينجي حاياتي نه تهه ر قانا؟!
بو گون بولدوم آنلاريمي جوْجوقلارا
دئديم هله يئنه ده آنام ، قالسين سونرايا
بيردن تيتره دي اوره ييم
اوشورگه ندي ديله ييم
بلكه صاباح اوْلمادي؟!
بلكه اولمادي صاباح؟!
كاش اولايدي اينديجه
گؤروشمه يه بير ماجال

آردي-Ardı

رؤيا باقرپور-دنيز

«شام سؤنمكده دير»

ايندي كي بو شام سؤنمكده دير
نه فرقي وار كپه نك اوْلا يا اوْلمايا؟
توتقون گوزگودن
چالماق ايستيره م
گاهدان دنيزين قيراغيندا اوْخورام
گاه غزليمين ساچلاريني
قايالارا ياخيرام
رؤوياليقدان دا
داي دوْيورام
آل گؤزلرينين آتيشقاسيندان
شئعرلريمه بير «آي» ايسته ره م
يالنيز بيرجه «آي»
ايندي كي بو شام
سؤنمكده دير
نه فرقي وار ... ؟!

آردي-Ardı

شهناز صالحي-باهار

«قوْيما سوسا الينده كي كامانچا»

قوْيما سوسا الينده كي كامانچا
كؤنوللره ياشيل سئودا دوْلونجا
اوشاقلارين آرزيلاري بوْيونجا
«عرشه قالخسين صولحون سسي نغمه سي»

چال سن اوْندا باياتيلار هاواسي
وار سسينده آنالارين لايلاسي
چيچكله نسين اوشاقلارين رؤوْياسي
«عرشه قالخسين صولحون سسي نغمه سي»

اوجالانير نغمه سينين شن سسي
دنيز كيمي دالغالانير هر سسي
چيچكله نير اوره كلرده هوسي
«عرشه قالخسين صولحون سسي نغمه سي»

كؤكله اوْنو ديزين اوسته آل ايندي
ماهنيلاري ديلدن ديله سال ايندي
آشيق قوربان، ساري گلين چال ايندي
«عرشه قالخسين صولحون سسي نغمه سي»

چال سن آشيق اوره ك غمه دوْلماسين
بو غملردن بنؤوشه لر سوْلماسين
هيجران دردي بؤيوك نيسگيل اوْلماسين
«عرشه قالخسين صولحون سسي نغمه سي»

آردي-Ardı

زهره وفايى

ياساق سئوگى

ساچلاريمى باشقادان اؤرته اؤرته
اونلار نه واخت آغاردى؟ هئچ بيلمه ديم!
سسيم آستا چاتسين ياد قولاقلارا
حاق سؤزو ده ديله گليب دينمه ديم

بوى بوخونوم گؤزه گلمه سين دئيه
كؤلگه كيمى دووارلاردا سوروندوم
آلاقارقا آدلانماق قورخوسوندان
ائلين قارا پالازينا بوروندوم

سؤز آناندان "قيزلار گولمه ز" دئديلر
گولمه ديم من ده٫ دوداغيمى يومدوم
دونيا شنليك ائديب گوله ن زاماندا
من قارالميش غملر ايچينده تومدوم

سئوينجى بيلمه ديم٫ جوشوب قاچماديم
بير اينسان تك هئچ زامان باغيرماديم
"دؤزومسوز" آد قويولماسين اوستومه
ايمداد اوچون هئچ بير كس چاغيرماديم

اوجا اوجا دؤرد دووار آراسيندا
اوخوماديم ماهنيلار٫ سسيم باتدى
اله دوشمه ز عؤمرومون گنج گونلرين
ياسالار دييرمانى دن كيمى دارتدى

آرتيق بئينى بوش دئمه سينلر منه
گيزلينده آغلاديم٫ گيزلينده گولدوم
دونيادان خبرسيز قاريشقا كيمى
ذرره جه دامجينى بير عوممان بيلديم

من دينمه ديم٫ من هئچ نه دانيشماديم
آنجاق "ياسا"لارى يازانلار يازدى
ساختاكارليقلار سبب اولدو " اينام"
طبيعتين دوزگون يولوندان آزدى

قاديندا روح واردير؟ اينانماديلار!
"بير لش كيمى اونو چنگلدن آساق!"
دئديلر٫ يازديلار٫ هم قول قويدولار:
"قادينا سئوگى ده ياساقدير٫ ياساق!"


Köçəri quş

Gələrəm demişdir köçəri bir quş
sovuşdu bu bahar yenə gəlmədi
təkrar bir görüşün sözün vermişdi
unutdu əhdini-ilqarı yenə gəlmədi
***-------***
Bəlkə də uçanda yurduna sarı
bir namərd ovçuya tuşlanıb qalıb
bəlkə də bir yaşıl güllü budağda
yorğunam deyibdir, huşlanıb qalıb
***-------***
Deyirəm bəlkə də əsir düşübdür
əlacsiz çırpınır dəmir qəfəsdə
haraylır uzaqdan elin-dostların
nə deyir görəsən o son nəfəsdə?
***-------***
Yaxşıca tanıram qara baxtımı
sındırar qanadı, bağlayar yolu
itirər izləri, əsdirər yeli
basırar gölləri, bitirər külü
***-------***
Qınayım baxtımı görəsən ey dost?
yoxsa yollarını hələ gözləyim?
yeni bir bahara ümid olarkən
bu qərib yazıya boynumu əyim?
***-------***
Zöhrə Vəfai- 2006

(( يئني بير گونش ))


خام دئييلديم اوندا كي ال ا وزاديب
گونشين اته يين يالواريب – توتدوم
ياشاتماق اوماركن اونون قاموسون
ياخيب يانديرماغين يئرلي اونوتدوم

------

اوندا كي قوشولدوم چــــاي آخارينا
مقصديم دريالــــــره چاتــماق ايدي
داش لارا چالماغين هئـچ اينانمادان
دوزوم ايله باغــــريندا آخماق ايدي

---

او گون كي ييغماغا آچديم اته ييم
كرامت ا ولد وزلارين ايسته ييرديم
« توپلاييب ياراتماق يئني بيرگونش
آرزوسيندان » باشقا حال دا دئييلديم

----

من اوزاولچوم يله حيات سوروردوم
انسان لاردا انسانليق ايـــــزله ييرديم
اوجا گورونمه ييم يار – يولداشيمدان
ايكي قات دولانيب بــــــاشيم اييرديم

-------

نه بيله يديم ياغيش دا چوخ ياغاندا
اوزحورمتين آزالديب – اسكيدرميش
داغ دوشونده بيته ن يئرسيز نرگيزي
تولكو مردارلاييب گئچي ديدرميش

-----

نه بيله يديم چوخ همت ده ياراما ز
حاق سيز وئريليرسه،منت سيز اولسا
چوره ك ده يئر اولار قدير سيز قالار
زحمت سيزتاپيلسا،خود دردسيز اولسا

------

نه بيله يديم گره ك هـــــاراي چكيديم
ايچيمده ياشاتديقيم هـــــــاراي لاري
قارانليغين قوروقچوسو گـوزوندن
گيزله ديديم اولدوزلاري – آي لاري

------

سايـــي سيز سيررلر بيليره م ايندي
افسوس ! اينام لاريم من له يارانيب
نــــــه آتماغا امكانيم نـــــــــه اوتماغا
توتاق كي كيمسه لر مني خام سانيب !
-------------------------------------

(( لكير ))

آخان گوزگو – سانكي
سو – گلدي باغا.
آمما او يوزدن ،
بولانليق چيخدي .
بللي اولاركن ، باغدا بيريسي ،
كيرلي كوينه يين – قارا اوره يين – قانلي ا للرين
سودا يوموشدو ....
« سوچونو باشدان آچان بيريسي »
تولكولر باغي !!
-----------------------------

نه یازیم ؟

محبت بیلمه ین سئوگی گورمه ین
داش اوره کلی او دلداره نه یازیم؟
بولبول سسی قولاغینا چاتمایان
گول دن آرتیق اولان خاره نه یازیم ؟

دیلی دیلیمدن دیر آمما سوز آلمیر
یالواریرام یوخومدا بئله قالمیر
آی لار ایللر اوتور قاپومو چالمیر
بو دردیمه گوره ن چاره نه یازیم ؟

یول اوزونده سئرا دوران خودک دن
آرزی اوزون اللر آمما گودک دن
حسرت یوکونه چئوریله ن اورک دن
شرح اولاراق مین بیر پاره نه یازیم ؟

منه یئتیر هر نه دردی ، کده ری
خنجر اولوب یئرتایدیم بو قده ری
بوشلایا بیله یدیم بئله هده ری
اوزگه صاندیقیندا واره نه یازیم ؟

یازیق زهره عبث یئره جان آتما
فرح سیز سئودادا عومور قوجاتما
قلم یورما اوزون ، کاغیذ قاراتما
عرضه اوخومایان یاره نه یازیم ؟

--------------------------
یاشا کونول

امتحان دان یاخشی چیخدین آ کونلوم
او ، داندی ایلقاری . سنسه دانمادین
ایناملی آتاراق آتددیم لارینی
نه پئشمانلیق نه ده دونمک آنمادین

آلاو کیمی اوجا-اوجا قامتین
تهمت دومانلارین قوغدون اوزوندن
کده رلره دونه – دونه قاتلانیب
اوزون آغ اولسون ! دونمه دین سوزوندن

یاخشی دئمیشلر سئوگی بیر آلله بیر
ائلدن کنار اولمادین ، وار اول ! وار اول !
سئوگی لری باغریندا بسله یرکن
جهد ائیله جهاندا بار اولما یار اول

یاشا کونول یاشا عشق عالمینده
بو سعادت هر کسه نصیب اولماز
عشقین بولاغیندا چیمه ن نرگیس لر
یوز پاییز گورسه ده سارالیب سولماز

هئچ فیکرینی وئرمه نفرته - کینه
عشقی یاشاتماق دیر سنین صنعتین
ائل سئوگی سین تک باشینا بسله مک
بیلیره م عزیزیم چئتین دیر چئتین!

-------------------------------------
اولاندان سونرا

داها گیزلتمه یه ائل دن نه ییم وار
دردیم دیلده دستان اولاندان سونرا ؟
دامجی یاغیش داها نه یه گره کیر
پاییز ووروب گولزار سولاندان سونرا ؟

سنده من تک هیجراندان یاناجاقسان
عشقینی گیزله دیب درد داناجاقسان
سوزلریمی او گونده آناجاقسان
کونول ائویم داش لا دولاندان سونرا

رویالاردا آختاراجاقسان منی
سووراجاقسان زای یئره خیرمنی
ثمر نه دیر سئیر ائده سن چیمنی
دستان لار بالی پر یولاندان سونرا؟

بنوشه لر تیکانلی کولا سارماز
عشق یاشا دان نیفرته – کینه وارماز
نه پئشمانلیق نه خوشدیللیک قایتارماز
شاختا ووران باغی بوراندان سونرا .

---------------------------------
کولک

آی عطیرلی سرین کولک ،هانسی داغدان اسیب گلدین
آیریلیق یارادان یولو ، منزل - منزل کسیب گلدین

سویله گوره ک او یوللاردا ، گله ن وارمی دیر بو یانا ؟
اوموت واردیر ، سویله گوره ک ، یاتمیش باختیمیز اویانا ؟

گوی ده بولوت یئرده چیمن ، چای لاردان سو آخیر آیا ؟
قیزیل تارلالارین گوزو ، یول دوشونه باخیر آیا ؟

هئچ سوروشان وار بیزلری ، بو فلک له نه چالیریق ؟
هئچ نیگران بیر گوز گوردون ، دئیه اولموشوک ، قالیرق ؟

سویله گوره ک بو عطیری ، هانسی گوللوک دن چالمیسان
بو سرین نمیش نفسی ، هانسی بولاق دان آلمیسان ؟

اولمایا سن یاشایش سان ، بلکه حیات بلکه نفس
بو دوستاغا یول آشمادان ، نه دیر سبب ؟ یوخسا هوس ؟

تانیمادان سنی کولک ، اووج لاریمی آچمیشام
قانات کیمی آغ لـلـه یی ، قولوم یئرینه ساچمیشام

سیخیر منی بو دورت دیوار ، بیر قانات آرزی سیندایام
قوشول منه بیر اوچوش دا ، گوررسن تا سنه تایام

حقیقت ده من اوزوم ده ، بو توپراق دان قول آلمیشام
آیاغیم بندده اولسادا ، اللریم له یول آلمیشام

من ده قارشیمدا گورموشه م ، پاتشقانین باغلانماغین
تانیش گوزلرین دونمه گین ، اوره ک لرین داغلانماغین

من ده کولک سنین کیمی ، باش گوتوروب قاچمالیام
انسان قوران سرحدلردن ، همت ائدیب آچمالیام

منیم شعریم بوندان سونرا ، آزادلیق سوزوندن دولار
گوی گورولسون کوتان آغاج ، قانات آچیب کولک اولار .

------------------------------------
آناش سئرچه

سون باهارین سون گونلری ،دونوب گونون رنگی ، سولوب
آیریلیقین وای خبری ، آغاج یارپاقلارین یولوب

چیمنلیق دان هئچ اثر یوخ ، بیر لاله ده پاریلدامیر
چشمه آخیر یورغون – یورغون ، اوموزلاریندان تر دامیر

گون سورونور آتددیم – آتددیم ، دیوارلاری آشیر گئدیر
گوزو سوزگون آنلی قیوریق ، گئچمیش یوکون داشیر گئدیر

نه باغ نه بوستان نه چیمن ، نه بنوشه – نرگیز یاشیر
حیات قورقوسون بیلمه ین ، بو دیگرگین حالدان چاشیر

آقشامین سرین نفسی ، دوندورورو گولوش لری
داغ باشینا چوکه ن قیرو ، تله سدیریر هر کوچ لری

بو وانفسا مئیدانیندا ، بیر قارانقوش یورغون – آرغین
آیری دوشموش کوچه ن لردن ، بلکه ده بیر یولدان آزقین

بیر بوتاق دا دایانارکن ، سولان گولزاره گوز سالیر
یاشاتدیقی خوش آنلاری ، بیرجه بیرجه یادا سالیر

باخارکن دیوار باشینا ، بیر سئرچه نی اوردا گورور
سئرچه خبرسیز هرنه دن ، یوواسینا تاوان هورور

دیمدیگینده لـلـه ک لری ، بو یووادان اونا داشیر
قارانقوشون باخیشیندا ، خام لیق اونا نه یاراشیر !

ظرافت آختاران بو قوش ، دینمه دن ایله شیب باخدی
سئرچه نین بوش چالیشماسی ، نهایت اوره یین یاخدی

باغیردی آی سئرچه قارداش ، نه دیر سبب نه دیر تلاش ؟
گورمه ییرسن بوران گلیر ، هامو قاچیر ؟ سنده قوی قاچ !

نه دن بو ویرانه لری ، بوشلامیرسان ؟ ال چکمیرسن ؟
صاباح قارا قیش گلنده ، بو دیاردا سن تک می سن ؟!

گوی اوزونده کوچه ن قوشلار ، نه دن سنه اویوت اولمور ؟
نه یووا بسله مک چاغی ، سنین بوش بئینین هئچ دولمور ؟

سرچه بیر آنی دایانیب ، ده ریندن بیر نفس آلدی
بو سوزلری دئیه ن قوشون ، قافاسینا گور نه سالدی :

دئدی یازیق ، سن کوچری ، نه بیلیرسن یووا نه دیر
چاره سی اولان بیر درده ، یازی نه دیر دوعا نه دیر ؟

من بو ائلین باهاری له ، گون لر گوروب شنله نمیشه م
اوچورتموشام بالالاری ، بو بهره دن انله نمیشه م

من بو یوردون یاغیشیندان ، دامجی دامجی داد آلمیشام
اونون ابدی ادیندان ، اوز ائلیمه آد آلمیشام

خوش چاغیندا یولداش اولوب ، ائلیم ایله دولانمیشام
نه سن کیمی دار گونونده ، اونون وارینی دانمیشام

یازدا باهاردا هم قیش دا ، من بو ائلی له یولداشام
عومور دئییرمانیندا بیل ، قئییم گورونه ن دیب داشام

گئدین سیزلر خوش یاشایین ، من ائلیم ایله سر خوشام
یوردوم قالسین منه یئتر ،اونون عشقی له سوز قوشام !

--------------------------------
داش اوره ک

آرزولیرام منیم اوره ییم سن تک
داشدان یونولایدی داشدان اولایدی
سونرا بو گردشی پوزوب ، داغیلدیب
توشلادیقیم گونلر باشدان اولایدی

اوندا یقین اوره ییمین سیرینی
آچیب سنه تامام بیان ائتمزدیم
بیر دیلنجی کیمی یالواریب سنه
سونسوز بو سئودا یولونو گئتمزدیم

اوندا گوزومون یاشینی گیزله دیب
اصلا سنین قارشیندا آغلامازدیم
دویاردیم او اوزاق گزه ن گوزلرین
گئده رگی یولونا بئل باغلامازدیم

گوروشون نه قده ر اوزاق سوره ردی
یقین دوزه ردیم او اوزاق گونلره
آنلایاردیم داش ایله گول نسبتین
حئیفیم گلردی وئردییم گوللره

ائیله حالدا بو نه دیر درد یا درمان
هئچ بیرینی آختاریب آرامازدیم
ائشیتدییم آجی – آجی سوزلره
یقین یاراشمازدیم هئچ یارامازدیم

چوخ غریبه گورونمه سین بو آرزوم
گون اولاجاق باغریم داشا دونه جک
بو چیرپینان آلاولایان اوره ییم
یانیب – یانیب نهایت ده سونه جک .
----------------------------
بیر شکیل

چاغیریرام سنی تامام حیسسیم له
بری دولان قووش سوزومه سئوگیم
دامجی – دامجی یاشیل باخیشلارینی
دامیز یانقی قالان گوزومه سئوگیم

باغا دونده ر بو قوراقلیق دوزگانی
آچیل حیاتیمدا چیچک تک آچیل
سویوق گونلر یازیمدان سیلینمه یه
گونش اول دومانلی گویومده ساچیل

قوی بیر شکیل چکیم آرزولاریمدان
اون دورت یاشدا آل یاناقلی بیر قیزی
قونشولوق دا بیر آداخلی بیر سئوگی
گله جک ده یوخ هئچ رقیبین ایزی

قوی یارادیم کوی دن کنار بیر بولاق
بیر کوزه باغلاییم قیزین قوینونا
قوشوم دالی سی جا گئده ن سئوگی سین
ایسته ک دولو قولون سالیم بوینونا

قوی ایندی کی من یاشایا بیلمه دیم
آرزی لاری یاشادیم ایسته ییم تک
بئیله کولگه کیمی سورونه ن حالدا
کیم منه حوکم ائده ر آرزیندان ال چک ؟

سن گونش سن باتما منیم یازیمدان
کولگه لییم تکجه سن له یارانیر
بو سعادت منه همیشه لیک دیر
یازدیقیم سوزلری یار اوخور – آنیر .

آردي-Ardı

مدينه گولگون

مدینه گولگون

شاعيره مدینه خانيم علی اکبر زاده ۱۳۰۵ نجی ایلده آنادان اولموشدور .هله مکتبده اوخودوغو زامان بئله شئعر و ادبيیاتی بٶیوک هوس و ذٶوق ایله سئومیش و ادبی اثرلری دٶنه دٶنه اوخوموشدور .

تبریزده (وطن یولوندا)قزئته سينده ايشتيراک ائتمکله مطبوعات عالمينه قدم قویموش بو جاوان ازربایجانلی قیزی عئین زاماندا ايجتيماعی ایشلرده ده چالیشماق و فاعاليیت گٶسته رمکدن گئری دورمامیشدير .

مدینه خانيمین شئعرلری (وطن یولوندا) ،(آذربایجان)، (خاورنو) روزنامه لرینده چاپ ائدیلمیشدير.

ستتارخان هئیکلینین قویولماسی موناسيبتیله

ساعادت بایراغی

بوگون یئنه جوشغون قلبیم سئوینجدن هئی جوشور ...
شن حیاتدان ايلهام آلیر آزاد گونه سٶز قوشور

او دئيیر کی : بیزیمکیدير بو ساعادت بایراغی
دوشمنلردن قورویاریق دايیم آنا تورپاغی

بیز وطنین اٶولادیيیق، بورجلويوق بیز وطنه
یاغی الین اوزاتسا دا بو باغا، بو گولشنه

قویماریق او باغچامیزدان چیچک اوزه، گول دره
بیز اينتيقام قيلینجينی قالدیراریق گٶیلره

یوردوموزون هر بوجاغی اولوب آسلان یاتاغی
بو تورپاغا ده يه بیلمه ز یاغیلارین آیاغی

اودلاریوردو بو ديیاردير، ایگیتلردن بیر نيشان
مرد آدلاری قلبیمیزده یاشایاجاق هر زامان

او آدلارلا فخر ائیله ییر بو ائللرده هر نفر
او آدلارلا، یاراتمیشیق دٶيوشلرده مین ظفر

او آدلاری بایراق ائتدی، خالقیم دوردو آیاغا
او آدلارلا، غاليب گلدیک ،هر خايينه ،آلچاغا،

او آدلارلا، فدايیلر دوشمن اوسته یئریدی
آل گونشین قاباغیندا قارا بولوت اریدی

قلبیمیزده غضب ، نيفرت بسله ییریک دوشمانا
چونکو بیزه ازل گوندن تاپشیریبدير مرد ـ آنا

او دئیيبدير: بابک کیمی اه يیلمه یین یادلارا
قودوز دوشمن یاخین گلسه یاناجاقدير اودلارا

او زامان اود پوسگوره جک آزربایجان تورپاغی
آلوولاردان یوکسه له جک بو ساعادت بایراغی

الیمیزله یاناجاقدير گله ن نسلین چيراغی
یاییلاجاق قوجا شرقه آزادلیغین سوراغی

زيندانلاردان چیخاجاقدير خوش گونلره هر ميللت
تاریخلرین ورقینه یازیلاجاق بو شٶهرت

چوخ شادام من ،سئوینجلریم سیغیشماییر دونیایا
آزاد کٶنلوم داستان اوخو! بو گونه شه، بو آیا

خالقیم بو گون قيیمت وئریر ، اٶز بٶیوک اجدادینا
شاعيرلر ده، شئعر قوشور، ستتارخانلار آدینا

شاد اول سن ائی، وطن اوغلو! اٶولمه میسه ن، بیل بونو
وطنیمده اٶز الیيله ، گئییب آزادلیق دونو

اونا شاهيد قارشیمداکی ستتارخان´ین هئیکلی
اونو عرشه اوجالدیر باخ! مرد اينسانلارین الی

گولگون´ه ده ايلهام وئریر بو ساعادت، بو حایات
یاشایاجاق ابدیلیک خالقیم قوران بو بساط .

ائل آراسيندا

بير نغمه اوخودوم٬ ترجومان اولدو
دانيشدي درديمي ائل آراسيندا
بير نغمه اوخودوم٬ بولوت تك دولدو
كورله دي دوداقلار ديل آراسيندا

آغلايابيلميره م گوله بيلميره م
هيجران چوخ چكه جك٬ هله بيلميره م
حسرتي انگلره بؤله بيلميره م
گون گئچير٬ آي ايله ائل آراسيندا

من بير حيات ايديم ائللي٬ اوبالي
من بير سئوگي ايديم٬ عهده وفالي
من بير كارايديم هايلي هارايلي
سيم قالميش بسم الله زيل آراسيندا

نه اولا سئوينجدن آغلايا گؤزوم
نه اولا داغلاردا عكس ائده سسيم
باهار ياغيشينا گيره تبريزيم
يويونسون عوممانلار سئل آراسيندا

یازان: مدينه گولگون


گؤنده ره ن: Redaktor webmaster@gajil.20m.com

بير عؤموره م ، يازيم سنسه ن
بير نغمه‌ يه م ، سازيم سنسه ن
بير اوره ‌يه م ، آرزوم سنسه ن
هارا گئتسه ن آپار مني

بير چيچه يه م ، شئهيم سنسه ن
بير صؤحبتم ، نئييم سنسه ن
بير بولاغام ، مئهيم سنسه ن
هارا گئتسه ن آپار مني

بير لايلايام ، دونيام سنسه ن
بير جوت گؤزه م ، رؤيام سنسه ن
بير سئوگييه م ، سئودام سنسه ن
هارا گئتسه ن آپار مني

بير اوجاغام ، اودوم سنسه ن
بير عونوانام ، آديم سنسه ن
بير قوشام ، قاناديم سنسه ن
هارا گئتسه ن آپار مني

گئنيش گؤيلر قوشا قالسين
آيريليق داغ - داشا قالسين
ايزلريميز قوشا قالسين
هارا گئتسه ن آپار مني آپار مني ...

چينار بويلوم

نويد آذربايجان- اورميه

چينار بويلوم زامان سنله دوز دئمير،
ساغدان ، سولدان گله ن سئله‌ نه دئييم،
سن دؤزورسه ن ، دؤزمه ز نه داش ، نه دمير،
فلك قالخيب بمدن زيله ، نه دئييم.

***

دميره باخ ، سويوق ، سويوق دؤيولور،
دميره باخ، نه سينير ، نه اه يييلير ،
بعضن سلام ، ساغ اول ديلده دئييلير ،
عؤمروموزده گئچير بئله نه دئييم.

***

ساچلاريندا بو يوللارين گوموشو،
نيسگيلي‌نين نه سايي ‌وار ، نه ياشي ،
سن چكيرسه ن فيل چكمه‌ يه ن بو داشي ،
چوخمو يول وار او منزيله ، نه دئييم .

***

هئچ بيلميره م ايللر بيزه نه وئردي ،
هاردا اولدوق اوردا حسرت گؤيه ردي ،
چينار بويلوم هارا يازيم بو دردي ،
واقتسيز گئچه ن آيا ، ايله نه دئييم.

***
كروانيني سوروب گلير پاييزدا ،
خزه ل ـ خزه ل عؤمور گولور پاييزدا .
بو خزه للر هئي تؤكولور پاييزدا ،
قونور اوزه ، قونور تئله نه دييم.

***
چينار بويلوم نييه داشمير صبريميز،
لاپ حئيرته گتيرميشيك صبري بيز،
نه ناغيليق ، نه حئكايت نه ده سؤز،
بو ناغيلي بيله ـ بيله نه دئييم.

***

اللرينده قابار ـ قابار ناخيش وار،
بو قابارلار عؤمروموز ناخيشلار،
بيزي سسله ر او زيروه ‌لر ، يوخوشلار،
گئديله‌ سي يول وار هله ، نه دئييم.

***

چينار بويلوم بو پاييز دا عؤموردو ،
گل سورماياق طالئع بيزه نه وئردي ،
سئوگي وارسا ، سئوه نلرين نه دردي ،
قوجالاريق آيا ، ايله نه دئييم.
بيز چيخماساق بير گون يولا نه دئييم

آردي-Ardı

ماهني زنگانلي- پریسا بابایی فرد زنجانى

نئيله ييرم ياد ائليني

نئيله ييره م ياد ائليني
منيم شانلي ائليم واردير
سئومه ييره م ياد ديليني
بال تك شيرين ديليم واردير

اوره ييمده اولان سؤزو
آنا ديلينده يازيرام
كيم پيس باخسا بيزيم ديله
هي اونا قارقيش يازيرام

آنجاق دئييم
آنام منه
اوز ديلينين ماهنيسيندا
لايلاي چاليب، يوخلاميشام
عؤمرو بورا حاقلاميشام
بو ديل ايله بوي آتميشام
بو ديل ايله ياشاميشام
نه ياشاما، حسرت يوكو داشيميشام
آمما نئيليم، ياد ديليني بسله يه ركن
اؤز ديليمه ياد اولموشام
اؤز ديليمه ياد اولموشام

یازان: ماهني زنگانلي

گؤنده ره ن: Redaktor webmaster@gajil.20m.com

هئئئئئئئئئئئئئئی!!!!!!!!
آرخامجا سورونورلر کؤلگه مه قارشی !!!
منی بیر عٶموردور دابانلاییبلار،
بیر دنیز دولو دالغا ایضطیراب
ایچیمده جالاییب، دامار سوروبلار.
منی بیر آنلیق اؤزومه تاپشیرین ،
تاپیم او ایتمیش اؤزلویومودن،
گؤزلریم اؤزومدن شیکایت آغلیر،
چوخ اوتانمیشام باغلی اللریمدن.
قلمیم قوسوبدور هر نه وار یوخون،
اؤزگه یایلاسیندا غریبسه میشه م ،
من اوتانمیشام باغلی اللریمدن ،
کسیک دیلیمدن ،
من اوتانمیشام.
هئئئئئئئئئئئئئئئئئئئئئئئئئئئی !!!
آرخامجا سورونمه یین کؤلگه مه قارشی ،
تؤکولموش منلیییم یئرده اینجیییر.
سانمایین ،
سانمایین قورخورام ایچیم تیتره ییر،
سانمایین… .
آرخامجا سورونسه ز ده کؤلگه مه قارشی،
آرخامجا سورونسه ز ده کؤلگه مه قارشی،
بیر دنیز دولوووووووووووو ،
بیر دنیز دولو صبیرداشییام ،
صبیر داشییام.

منی سنسیزلییه آداخلادیلار
بیلمه ییردیلر منلیيیمی سن ایله تاپمیشدیم.
هه ، سئوگیلیم
هه!!
دویغولار دربندینده آوارا یولچولار کیمی
ایزینی ایزله ییردیم،
قارا دوواغا بورونه رکن،
یولونا بویلانیردیم.
یالانچی گؤزلر،
تومورجوقلو باخیشلار
گیزلینجه گولوردولر.
اوزاقلاشمیشدین مندن!!
اوزاقلاشمیشدین...
آداخلی بارماقلیغیمی،
چیخارماق ایسته ییردیم سنسیز!!!!!

Avarə yolçular kimi...

Məni sənsizliyə adaxladılar
Bilməyirdilər mənliyimi sənlə tapmışdım
Sevgilim,
duyğular dərbəndində
avarə yolcular kimi
izin diləyirəm
İlişirəm qaranlıq addımına
Yabancı gözlər...
tomurcuqlu baxışlar...
gizlincə gülürlər...
Uzaqlaşıbsan.
Mən də
adaxlı barmaqlığımı
çıxartmaq istəyirəm.

---------------------------

شيلتاق- شيلتاق،
باخیشلارین کال بطنینده
تومورجوقلانیر سؤتول ایناملار.
بورادا بیر قادینین بیتمیش سوچسوز اللری،
دوزلاقدا تاپدالانمیش بیر محببته سایریشیر ،
کؤنولونده،
بلکه چارداق قورموش دیلکلرینه
گرچک گئییمی گئییندیره!!!!
10/12/78
------------------------------------------
قوجاغینی آچیر منه،
سئوگی یولو باخیشینی حیاتیما
سره – سره
آچیر منه قوجاغینی.
گئچمیشلری گؤزلریندن
دره- دره
معنا تاپیر قادینلیغیم.
شئعرلریمین روحونداکی رؤیالاری
باغیردیقجا دوزه بنزیر
حیات یولو
باخیشینی سره،
سره...
13/10/78
----------------------------------
فروغ فرخزاد`ین (و اینک منم زنی تنها در آستانه فصلی سرد) شئعرینین سئچیلمیش بندلری نین ترجومه سیدیر کی قیرمیزی حیصصه لری منه عاییددی


1

بو منه م بیر قادین
دونموش زامانین بیتیشینده
یئرین ایلک وارلیق آنلاییشینین
بولاشیغیندا.
گؤیون کده رلی،
بزه کسیز اومودسوزلویونده،
بو داشلارلا باغلی اولان اللرین طاقتسیزلییینده.


2

آغیر بیر زامان
سوووشمادا!!
ایندی بو منه م
بیر قادین،
سوووخدان کیریمیش گؤوده م
قیسیلارکن تیتره ییر.
هئی-هئی
دوشونوره م!
دوشونوره م! مؤوسوملوکلرین سیرررین
آنلاییرام! لحظه لرین سون سؤزلرین
آنلاییرام...
بو توپراق، قارشیلایان توپراق
دینجلیيیه نیشانه دیر،
یالنیز دینجلیيیه.

3
یئل اسیر، یولاقلاردا
و من
گوللرین جوت له شمه سینه
غونچالارین آریق قانسیز قونجلارینا
فیکیرله شمه ده یه م
بو دارغین ، یورغون زامانین بیتیشینده.


4
بو منه م بیر قادین
دونموش زامانین بیتیشینده
گوزگولرین ماتم ییغیناغیندا
بویاغلارین اوفارمیش سیناقلارینین ماتملی توپلانیشیندا
بو آرتیملی آخشامین بیلیملیک سوکوتوندا،
اولار می؟
گئده نلره
بئله!
آغیر آوارا دؤزوملو
دایان بویوروغو وئرمک؟؟
نئجه دئمک-
اینسانلارا دیری دئییلسینیز
هئچ زامان دیری دئییلمیشسینیز...


5
ایندی بو منه م
بیر قادین
تاپدالانمیش آیاقلارین آلتیندا
باخیشلارین شیدیرغیسیندا
آنلامیرام!
یانی زامانیدا
بیر اؤلچوسو وار
اؤلچه م گئده ن قادینلیغیمی.
یازدیغیم شئعرلرین بویاغلاری آوازییب
قادینلیغیم سورگون گئدیب،
کده ر ائلینه.

بو منه م گرچکلر قادینی
اوزاقلاردان باخان
یالان کئچمیشه.

ایندی بو منه م
بیر قادین اؤزومدن اؤزگه
کؤلگه مدن گئری
دونموش زامانین بیتیشینده...
-------------------------------

سنی اؤزومده یئرله شدیریردیم!!!

چیبان کیمیدیر،
قودوز باخیشلاردان یاپیلان گؤزلریمه یالان محببتلر.
من ایسه کؤلگه م، کیمسه سیز کوچه لردن بویلانمادا،
دوزوله ن بوزلانمیش گؤروشلرده ، قیراقلیقدا،
سنی،
منی،
بلکه ده،
... قارشیلاییر.
بیر چییینلیک، بیر قوجاق نیفرت،
آیاقلاریم اوسته ده اؤلمه یه آرزیم دییه،
اوره ییمی اووجومدا گزدیریره م.
بیر رییاسیز توپراق،
بیر دوواغلی شکیل،
بیر یاپیلان دوداغا توستوسوز پاپریس،
ایندیسه اوره یییمه سس وئره ن اوره ک.
نه واریمسا اللریمده،
کؤلگه لیيیم بویدا کؤلگه لیک،
باخیشیم بویدا دا یاشادیغیم گونلری،
اوره ییمین ناکاملیغینا،
پیریم – پیریم
یول اوسته سریره م.
نه بیلیم،
بلکه بودا بیر ایلغیم ایمیش
و سنی اؤزومده یئرله شدیریردیم !!!
نه بیلیم،
بلکه ده ... یاشادیردیم!!!

ماهنی زنگانلی

----------------------------------

سئوگی منی یاشادیردی


آند ایچمیشدیم بو سئوگینی
تکجه اوره ییمده یاشادام،
یاشادیردیم،
ایللر ایدی یاشادیردیم.
نه بیله یدیم ،
نه بیله یدیم
ترسه اولوب،،،
سئوگی منی یاشادیردی.!!!

ماهنی زنگانلی
----------------------------
Cıplak bir dusunceye
Ve aksam ustu tenhalıqa,
doslerım usumustu…
sankı,yasamadan
beklide,
yasatdıqımdan yaslanırdım.
Tık- tık , sesını duyurdum…
saniyelerdende ılerı sururdu,
tı,
tı,
tıkkkk… .
bu curuyen caqlara acımayanlar…_
ah, ah…qıcıklanırım.
Dudaklarımda opus atesı levlenmeden,
Neden sonmeye basladı.
Bunu nakıllarda duymusdum,
Bir anne dilinden;
Olume gidenın ,
Dudakları buzlar
Evet, evet,
Bende,… .

MAHNI ZENGANLI

---------------------------------
سئویلمکدن داد اومموشوق

اینسانلارین پایی آنجاق بو دونیادان
تله سیک بیر یاشاییشدیر،
ائله جه ده ،
بیر دادیملیق سئویلمکدیر.
اینتیظارین آرخاسیندا،
ایلان کیمی قیوریلارکن،
شنلیک سوسور ،
سازلاریمیز آغی قوسور .
یاشاییشدان پای اومارکن،
سئویلمکدن داد اومموشوق.
تکلیکلرین ساحیلینده
عؤمروموزون گمیسینی،
فیرتینالار قوجاغیندا قوروتموشوق،
بو تله سیک یاشاییشدان،
پای اومموشوق،
سئویلمکدن داد اومموشوق.

ماهنی

---------------------

Baxısının sıdırıqısı,
Birden bire gozlerımı burudu
Baxıslarımı duman aldı,
Buludlandı,
Gorebilmedım,
Daha ne senı,
Nede –
Gozlerınde olan…
Gormedım.
Yasaq bir xeyala fikrimde humdum
Men uturdum baqırtılarımı
Yarırdım sukutumu
Caqırırdım nehayetımı
Dumanlı baxıslarımda gore bilmirdı.
Baxısların menden qacırdı,
Nutfede boqulmus nefeslerımıde,
menımkidi diye sovururdu.
Mende,
Bir yazıq qızın taleyı kozerırdı,
Alolanırdı,
Yanırdı,
Dirilmaqa can atındı.
Sen ,her zaman icerımde can tan
diriliyi sece bilmezsen,
gore bilmezsen,
duya bilmezsen .
men ureyimin cercivesıne
sancılan sevgini
omur boyudu beslemisem
sende nehayetsiz qanunlarda helede uzursen .
xeyal saclarınıda hormekde
tekce bir ucuz satılmıs ureye uymusan.
Dememisdım,
Dememisdım:
Bir gun damarların donacaqdır,
Dememisdım, dahada ruhun olmayacaq cismin olan yerde
Ve,
Bir mezar adlanacaq sen adda
Yox,
Yox ,
Men demisdım
Ama sen inanmamısdın.
Gel , berı gel ,
Qoy yaslanmıs bir toyun calqılarında uzdurum senı
Gel ,
Berı gel,
Goy yaslanmıs toyun caxırın dadızdırım sene.
Gel,
berı gel…
----------------------

Sevgi
Omur nobarısan , aqzımda dadım
Menım xeyalımdan suzulen sevgi,
Fikrinle yasaram mahnı dı adım
Tarımın telıne duzulen sevgi
İller yorqunuyam ,gunler pozqunu,
Ayrılıq kozuyem, bulud tutqunu,
Sen altın gunessen , mende susqunu,
Dodaq korpusunde, buzulen sevgi.
Gozlerım yolunda kozerır, koz tek,
Baxısın konlume soyleyır, doz tek ,
Konlumde cırpınır cop dusen goz tek,
Elı ellerımden uzulen sevgi.
Cen dusub gozleren aq dumanlarda ,
Xeyala cumubsan sen gumanlarda
Axar mehebbetsen, axan qanlarda,
Gozlerımden biten suzulen sevgi.
MAHNI ZENGANLI
---------------------

Doslerımın atifesi
Yene axsam caqı hesret,
yene derd,
calanır varlıqıma .
yene hicran naqılın sufrasını serdı gece
yene teklik tarını qurdu zaman
soyle amam
soyle aman .
son donumler duraqında,
gecemı paylasıram,
omrumun qarlı ,qırovlu kecidinde ,
zamana sayrısıram
gecemı paylasıram.
dererek ay paranı men xeyalımda
cemdeyım diskinerek ,
saqdıqım doslerımın atifesın
geceye paylasıram
hesrete taylasıram
hesrete taylasıram.
MAHNI


Gece aqırlıqı ustume cokur
İcim icimi dartıb eliyir ,
Tanrı bu gece dara cekilir.
Bir soyuq odada
Sankı duvarlar
Gozlerın yumub mene baxırlar.
Bir sıcaq qucaq,
bir isti urek,
bir dodaq…
Of – of,
Buzluqa cevrilen qansız bu sehir,
Ozun satan quduzlarla qucaqlasıb,
Tanrınında cemdeyini,quduz baxıs kopeklere
Didik- didik
Bolub verme sozun verır.
Qansız sehir ,
Ah bu sehir
Bu duvarlar olmasaydı,
bir axsamlıq yol tapardım ureyine.
Belkede bu duvarları,
Gudmek ucun
Ah ne bilim,
Yıxmaq ucun…
Hay verseydı harayıma
Bu sehirde,
Duvarların cemdeyine
Yaxsılıqa yaman diyen insanlara,
Sıqınmazdım.
Ah bu sehir bilmiyerek ,
Sehirde de gomulenler duymayaraq
Men tanrının cemdeyını,
ses siz- ses siz ,
odamdakı
xatireler duvarında mismarladım
kim ne bilir
bekle bir gun …
bekle…- .

آردي-Ardı

حئيران خانيم

شئعرلر- Şe'rlər

يكشنبه، 25 آبان، 1382
دکتر میر علي اکبر آل نبی

در کنار زنان قهرمان آذربايجان چون نگار همرزم کوراوغلو ـ هاجر هم رزم قاچاق نبی ـ کلدانيه هم رزم بابک ـ زينب پاشا قهرمان مشروطيت ـ فاطمه بنت نعيمی رهبر قيام خونين حروفيان تبريز وده ها قهرمان ديگر اديبان و شاعران بزرگی از زنان بودند که خدمات ارزنده ای به ادبيات مشرق زمين نمودند از جمله پروين اعتصامی٫ خورشيد بانو ناتوان٫ پسته شکار قيزی٫ مهستی گنجوی و...... که مجال بحث همه اين مفاخر ميسر نخواهد بود و ای کاش باشند دوستانی که در خصوص قهرمانان شير زن ترک صفحه ای جداگانه باز کنند. امروز بهانه صحبت شاعره ترکی است از تبار کنگرلو از دنبلی های آذربايجان. اين شاعره دختر کريم خان که از افراد صاحب نام تبريز بود ميباشد که بعدها به نخجوان مهاجرت کردند.

حيران خانم مدتها در شهرهای نخجوان٫ اورميه و بخصوص خوی زندگی کرده است. زمان حيات ايشان معاصر فتحعلی شاه قاجار ميباشد. دحيران خانم عمری پر برکت داشتند و در طول حيات خود زمان سه پادشاه قاجار را درک کرده اند. حيران خانيم نامزذش را در خلال جنگ های خانمان برانداز ايران و روس از دست ميدهد و تا آخر عمر دردمندانه چشم به راه بازگشت او ميماند و تن به ازدواج مجدد نميدهد. حيران خانم تسلط ويژه ای به زبانهای ترکی و فارسی داشته است و در طول هشتاد سال عمر خود موفق به خلق آثار بديعی شده است که از نظر کيفيت در حد آثار نوابغ شعرا است.

بويون سرو-ى سهی٬ زولفون موعنبر
جمالين يوسف-ى کنعانه بنزه ر

قاشين عاشيقلرين قصدينه گويا
خم اولموش تيغ-ى سر افشانه بنزه ر

آچاندا گؤزلرين آلير بو جانی
ياتاندا فتنه-يى دؤورانه بنزه ر

باخاندا نازيله تير-ى نيگاهين
کؤنولده خنجر-ى بوررانه بنزه ر

ديلين بولبول٫ ساچين سونبول٫ اوزون گول
کج اولموش کیپرييين پئيکانه بنزه ر

مه-ى روخسارين ائی حور-ى بئهئشتی
گولوستاندا گول-ى خندانه بنزه ر

ووروب باد-ى صبا زولفون داغيتميش
گول اوزده دسته-يى رئيحانه بنزه ر

لب-ى لعل-ى شفابخشين عزيزيم
بئعئينه چئشمه-يى حئيوانه بنزه ر

خالين هيندو صيفت کونج-ى لبينده
اوتورموش تخت آرا سولطانه بنزه ر

سنين کويوندا عاشيقلار فغانی
چمنده بولبول-ى خوشخانه بنزه ر

گؤزوم ياشی فراقيندان اؤزومه
سراسر لؤلؤ-يى غلطانه بنزه ر

اگر چه عاشيقين چوخدور ولئيکن
اينانما هئچ بيری حئيرانه بنزه ر
--------------------------------------------------------------------------------
صبريم كسيليب

بير نامه يازديم باد-ى صبا ياره يئتيرسين
شرح-ى غمي اول بوت-ى خونخاره يئتيرسين

هيجران المي سالدي آياقدان من-ى زاري
دارو-يي ووصالين من-ى بيچاره يئتيرسين

صبريم كسيليب، يار منيم جانيمي آلسين
يا شاد ائله سين وصل ايله ديلداره يئتيرسين

دونياده و عوقباده گؤروم مطلبه يئتسين
هر كس مني اول يار-ى وفاداره يئتيرسين

بير يول وئرين ائي مئحنت-ى هيجران كي پياميم
تا باد-ى صبا اول گول-ى گولزاره يئتيرسين

يوز حسرتيله بو ديل-ى هيجرانه گيريفتار
عزم ائتدي اؤزون اول گول-ى بيخاره يئتيرسين

گل تاري اوچون بونجا سيتم ائيله مه ايظهار
قوي ياره اؤزون بو ديل-ى آواره يئتيرسين

بىكس ليييمه رحم ائيله سين خاليق-ى بيچون
حئيران´ي او شهبازه ديگرباره يئتيرسين

گؤنده رن:webmaster@gajil.20m.com

يوسف کنعانه گلير
--------------------------------------------------------------------------------

غئيبدن يئتدي بيزه موژده کي جانانه گلير
نازنين زولف-ى پريشانه چکيب شانه گلير
عيززت-و شؤوکت ايله اول بوت-ى فرزانه گلير
قيل تماشا گؤزوم اول سرو-ى خورامانه گلير
تؤکمه يه عاشيقىنين قانيني مردانه گلير

اولدو ماييل يئنه بير آفت-ى دؤورانه کؤنول
آز قاليب شؤعله چکيب عئشق اودونا يانه کؤنول
جان فدا ائيله گيله ن اول شه-ى مردانه کؤنول
باخيبان سئير ائله اول مه-ى تابانه کؤنول
قيل تماشا گؤزوم اول مئهر-ى ديرخشانه گلير

ائيله دي ماه-ى روخي عاشيقيني ياد گئنه
اولدو ويرانه کؤنول موژده دن آباد گئنه
ديل اولوب غوصصه-و غمدن بوگون آزاد گئنه
باده-يي وصل-ى روخ-ى يار ايله ديلشاد گئنه
مئي-ى وحدتدن اولوب گؤر نئجه مستانه گلير

روز-ى اوول کي گؤزوم اول مه-ى تابانه باخيب
گؤزونون ياشي ايله ديجله لر عوممانه آخيب
اشکيمين دانه سي گردنينه عوقده ساليب
قددي خجلت اودونا سرو-ى خورامانه ياخيب
اوزو صد طعنه ويريب يوسيف-ى کنعانه گلير

گول-ى بيخار آچيليب گولشن-ى جان ايچره بوگون
روح تک جيلوه ائدير مولک-ى روان ايچره بوگون
يوخ اونون تک داها بير شاه٬ جهان ايچره بوگون
عدل-ى کسراني قيليب کسر شهان ايچره بوگون
شؤوکتي وئردي شيکست تخت-ى سوليمانه گلير

ائي خوش اول دم کي شهيم عاشيقيني ياد قيلا
لوطف ايله رحم قيليب صئيديني آزاد قيلا
مولک-ي ايسلامي ترححوم ايله آباد قيلا
دوشمني خار ائديب دوستلاريني شاد قيلا
تا ذليل ائله يه کوففاري موسلمانه گلير

گؤنده رن:webmaster@gajil.20m.com

رسوا-يى جهان
--------------------------------------------------------------------------------

ائي سيتمگر مني روسوا-يي جهان ائيله ميسه ن
گؤزومون ياشيني چون ديجله روان ائيله ميسه ن

همنيشين ائيله ميسه ن دوشمني ائي مايه-يي ناز
رشگدن جانيم آليب، باغريمي قان ائيله ميسه ن

گون كيمي عاريضيوه زولف-ى چليپاني ساليب
گونو گؤر ابر-ى سييه آلتدا نهان ائيله ميسه ن

نازيله، عيشوه ايله، سئير ائله ييب گولزاري
گؤسته ريب مؤعجيزه سن٬ سرو-ى روان ائيله ميسه ن

بير جانيم وارايدي ائي شوخ كي آلدين او زامان
اؤزگه جان داهي بو بيكسده گومان ائيله ميسه ن

قاشلارين تيغ-ى سيتم آلميش اله، كيرپييين اوخ
اؤلدوروبسه ن مني ناحق يئره قان ائيله ميسه ن

نه اوچون ائي شوخ نيقابين گؤتوروبسه ن اوزدن
رو-يي خورشيدوشي خلقه عيان ائيله ميسه ن

آلميسان عقليمي سردن منيم ائي آفت-ى جان
قدديمي مئحنت-ى هيجرينده كمان ائيله ميسه ن

هوس-ى وصليويله ائي مه٬ من-ى حئيران´ ي
باشي يئرده، گؤزو يولدا نيگران ائيله ميسه ن

گؤنده رن:webmaster@gajil.20m.com

مهپاره قاييتسين

يارب ، كرم ائت، اول بوت-ى مهياره قاييتسين
بير رحم ائله سين بو ديل-ي بيماره، قاييتسين

بو ديل كي، اونا منزيل ايدي، اولدو خارابا
عزم ائتسه اگر يار ، دامي هارا قاييتسين؟

شانه شانه چكيبن چين ائله، سال اوزه زولفون
قوللاب كيمي اوجداري روخساره قاييتسين

مورغ-ى ديل-ى زاريم يئنه آواره قاليپدير
زولفون خمين آچ، تا كي بو آواره قاييتسين

گل رحم ائله قوي عاشيقي بير ياره يئتيشسين
عرضين ائله سين اول بوت-ى خونخاره قاييتسين

چون كؤوكب-ى بختيم يئتيشيپ نحس مقاما
بير امر ائله تا ثابيت-و سيياره قاييتسين

عهد ائت، ائده سه ن جانيووي سن صيدق ايله قوربان
حئيران، يار اگر بير ده بو گولزاره قاييتسين

آردي-Ardı

نگار خياوي-خيياولي نيگار

nigar_xiyavi@yahoo.com

نیگار خیاوی (خییوو)

1.

ائوين ييخيلماسن ستارخان!

ييخيلماسين ائوين ستتارخان!
بو گونلر ستتارخان سطير- سطير سيلينير تبريز`ين
توركلويوندن
آز قالميش چوخلوغو آز-آز آزالير
چوخ گؤرونور دئيه ¬سه ن تاريخين اه ينينه تاريخده چوخ گؤرونه ن گؤرونتوسو
تپه گؤزون گؤزو آتيليب چيخير تپه¬يه
گؤزو او بويدا گؤتورمه¬يير
گوجو او آغيرليقدا چاتيشمايير ستتارليغا
چكيليشير لاپ باشا دار ميلله ¬نير ميللي سردارليغا
تبريز`ين ائوي اوشاق دئييل كي ريز- ريز ييخيلا
يا ييخيلا- ييخيلا بؤيويه
تبريزلييي كرپيچ- كرپيچ بورخولا
بوشاليب يوخ اولا نقشه¬¬نين ياخاسيندان

سنگريني ايستيتار ائله ستارخان
يوخسا بوردا تاريخ جوغرافياني بولدوزئرلرين نيرهانيري يازار دا، پوزار دا
صوفيان سيمانيندا سيلله¬يله بئتون تئراپي ياپيلار سنه
سنده¬كي تاريخه
چوخ چوخ چوخ مرتبه¬لي گؤبه¬لك بينالار بيردن بيره
ايستيتار چتيريني آچار آغرييان باشيوا
آغيلا ناغيلا سيغمايان اويون اوچار باشيوا
مندن دئمك ستتارخان!
سنگريني ايستيتار ائله
ارك`ين ده قولاغيندان توتوب ياواش ياواش اكيرلر
موصللا (مصلي) دالينا
دالدالاييب ديبه ردينين داغيتسينلار ياواشجانا
بوگون صاباح گؤره¬جكسه ن رئكلاميني
اوتاق بويدا بيلبوردلاردا
گؤره¬جكسه ن چارراهلاردا
اميره¬قيز نه تانييير كيمدي اميرخيز كؤپك¬اوغلو
كي دونيانين گون اورتالاشان چاغيندا گؤزگوره¬تي
قيزليغيندان توركلويونو گؤتوردو
ساللاخانا داشينيب موصلاليا ساللاندي
دوز ائله او آندان باشلاندي، باشلادي اريمك
اوتانقاج موم اولوب اريدي ارك
او قده ر، او قده ر، او قده ر بوشالدي،
بوشاليندي بو نااميرخيز الينده ارليكدن
بيلميره م فيشار-ي خونو، بيلميره م قان تضييقي يا دا قان باسينجي
يوك يوك يوكسه لدي، سكته گتيردي ارلييي ارييه-ارييه
كيمه اركؤيونله نسين ايندي ارك

ييخيلماسين ائوين ستتارخان
بوراسي تاريخلي بولدوزئر جوغرافياسي
سوْوخايا قالميش ائويني تئز اول ايستيتار ائله!


2.

قاراباغ قورباغاسی



بو قورباغا بير آغيز قاراباغ شيكسته­سي قورولداماق ايسته­يير

نئچه گؤللوك قورباغادي بللي دئييل

بير آزي توسباغا بير آزي آغا

آنجاق بو گونه­دك گؤردويوم ان قورباغا قورقور قاغا



زحمت­دي باغيشلايين چاتديرا بيلسه­نيز

يا دا ايشدي چاتسا الينيز قاراباغين چؤلونه

قارا بير داش تاپيب لطفن آتين بو قورباغانين بوغازيندا ايليشن گؤلونه

يوخسا شيكست اولموش قاراباغدان دويون­قارينا بير قورولتويا قاشينير آغيز بوغازي:

عززينم آآآ....ي تن دردي وطن دردي گئدر گلر اؤلدورر مني

نئينيم ال چك ياخامدان اييرمي فاييز بسدي بسيمدي گؤرر مني

دي دور گل قويما اوچور باشيمدان گل قادان آآآليم

بير چتول آراق ياريم مئتير دؤنر كاباب دؤنر مني دؤندَ­ر­ر مني

او يانا دؤندر مني، يار بويانا دؤندر مني

اؤلورم اؤلورم اؤلوره ه ه.....م گَل دردين آآآ.....ليم



عززينم آآآآ...ي گؤدن ياخشي

بير فينجان آرادا گؤبك ياخشي

دئييرم وطن بير آز ييغجام بير آز گؤدَك ياخشي

اَده بئله گؤبك ياخشي گؤدن ياخشي

پاي وئرمه­يه آآآ...ي باااالام هر نه­دن وطن ياخشي

اؤلمورم اؤلمورم اؤلموره­ ه ه .... م





3.

قاپيني آجيغيملا چيرپيب تلسه- تلسه قاراگيلدن بو‌زگيلدن چيخيرام

چيخيرام گئد­م ميركوركوروم­گيله

ياشاسين ميركوركوروم!

باشارير قارا دووشان­لارين بوينونا اوفله­ييب كيريتمه­يي

باشارير رنگي قاچميش شهري گوللَتمه­يي گؤزَللَتمه­يي

گولو واخ­واخي قيلا بيلمه­يي باشارير

گولو واخ­واخي نه­دي؟

بيلمه­يه بيلرسينيز زاواللي جوجوق­لار

هله­ليك سؤزلوكلردن اؤيره­نين ديلينيزي

نه بيليم هارالارينيزدا گيزله­ديينيز اويدو چاناق­لاريندان اؤيره­نين هله­لييينيزي

حدديني آشميش قان قيرميزي­دي گولو واخ­واخي



داوام ائتديرين دئويريشي ميركوركوروم اوزرينه

انقلاب ساياغي صاف چوروك ائدينيز/ سويوندورونوز

كوركوروم ائدينيز

قاراقانچير ديش­لريم قيجيريرسا قورخمايين لطفن بير شئي دئييل

خومار باخيش­لاريم گؤزلريمده قان چاناغينا دولسا ديكسينمه­يين

اؤزباشينا اولموش بوتون اورقان­لاريم

قان بوخچاسيدي بورولقان­لاريم

ياشاسين ميركوركورم- باغيشلايين كوركوروم-

قيزلارين قاندان يوخسون ياناق­لارينا گول قيلا بيلير

چوخ گوناه كيمي، ديرناق­لارينا چوخ سيچرايا بيلير





4.

هر بارماغي بير آچار

آچا بيلمه­دي ناچار چؤنبلمه دالدي، قالدي قاپي داليندا

آذربايجانيميز­گيلين اؤز قاپيميزلاريندا دالدا قالدي

ديلينين دال بوداق­لاريندا

بويونونون بوروق­لاريندا

ديله­نيب ديلنچيليينه دوشدو ديللنمه­دي ديل

آذربايجانيميزگيل، ديليميزگيل، بيز­گيل



بو هاوادا بو تونقال

بو هاواليقدا نه­يه آلوولانير كي دده­ميزي يانديرير

ديليم ديشيمين آراسيندا بير يئرلره ايليشيب مصب­سيز

اليمه اللي بارماق جوجرسه­ده دولاشيغيني آشا بيلميرم

بو بويدا توركليكده شعر قوشا بيلميرم

اججي مججي­يه قالديق ننه­ليك، لاترججي­يه قالديق ننه­ليك

"آلما گول آشدي ننه­ليك، ديليم دولاشدي ننه­ليك

آي بو ائوين كيچيك قيزي..." قوشولوب قاشما كؤپه­يين قيزي



سنه دئييرم گؤزومون قاباغيندان ايتيل ساريمساق

قان قوساسان سني سارساق ...ساق!







۵.

چاغيرين مني لطفن

هئج اولماسا بير آدرس سوروشون

چاغيرين مني آدسيز بير آدرس يا آدرس­سيز آديمي سوروشون

يا چالين قاپيمين زنگيني چكيليب گئريده گيزله­يه گؤزله­يين

من هؤوله­سه سئوينجك چيخاندا چالين چپيينيزه مني

گولوشوب قاچين

سونرا تئلفون آچين منه

آلو دئديييمده لطفن يامان يووزا باسين مني

هئچ اولماسا قيفيللي قولاغينيزا آسين مني

آسيلميش­لار...

دونقوز كيمي دووورمايين اوزومه بير آدرس سوروشون آدسيزليغيمدان

مثلن آلتميش ايلدي ساعات نئچه­يه كئچير گولوستان باغيندان

نئچه دقيقه قالير قالا، ارك قالا

كوله دؤنوب كوله­يه سوورولا

ساعات نئچه ايلدن بَري الي جيبينده قاباغا كئچير ساعات قاباغيندان

هئج اولماسا دئيين منه آدسيزليغيمين يئري هاردادي

سيجيلليمين آدينا كيم اؤزونه چيخدي آديمي

چاغيرين آديمي چاغيرين چيميزديرين چاخيرا

چاتلاق بير ايستكاني چيرپين چيغيرين باشيما

تئز اولون!



6.

هئچ كيمه چاتميرام

نه بير ايچيم سويا

نه بير لوغما چؤره­يه

مني چاغيران يارديما بئله چاتيشميرام

چتين- چتين چاتيليرام اؤز يؤره­لريمه

نَجور يئريييرم كي يول­لارين هاميسی آياغيمين اليندن اينجيير

هارا گئديرم كي منزيل­لرين هاميسي مني سويونور

كيمه چاغيريرام كي نيگاري كيمسه­ني بوينونا گؤتورمور؟

چوخ گؤرونورم دئيه­سن هئچ كيمه چاتمايا چاتمايا

سيزدن يامان تله­سيرم سيزين باشدان اولمايا

گلين كؤمك­لشين مني

چاتاق دونيانين ديبينده­كي دره­نين ديبينه گئدن اولاغا

اوردا بير سوسوز بولاغ وار بيليرم





7.

همين بو شعردن اعتبارن

شعرلريمي آدسيز دوغاجام

گؤبك باغيني كسيب آلتي آلت، اوستو اوست

بير گؤبه­لك كولو ديبينه گؤمه­جم

بئله قرارا گلديك بو گوندن بيرليكده

كولون آلتينا باسديريب يئرآلما تك

اوستونه كؤز باساجام بير اتك

قوي كئف­لري نئجه چكير ائله­جه پيشسينلر

زورلاماياجام نه اونلاري نه اؤزومو

كي من

اوست باشيمداكي آديمين آلتيندان نيققانا نيققانا اوزه چيخارتديم اؤزومو...







8.

اوچورومدان سؤز آچيرام

آمما دوغروسونو ايسته­سه­نيز

خيرتده­يه كيمين بير كاناپه­نين يومشاقليغينا لملنمكده­يم

قاربوران هارت پورت زيغ چامور فالان فيلان

آمما سؤز سيزدن چيخماسين آلتيم اوستوم ايپ ايستي

ايچيلمه­يه حاضير چاينيكده دملنمكده­يم



نیگار خانیمدان ۵ کیتاب چاپ اوزو گؤرموشدور. (منیم شعریم / گؤلگه ده کی سس / شهرین جیریغیندا نیگار / توپ و بیل عزالیلاری "ترجومه" ) یاخین گله جکده ایسه (اللی بارماق) شعر توپلوسو یایینلاناجاقدیر.

عزیزینه م بیرده سن…

اوستاد فرزانه نین دونیادان کؤچمه سی موناسیبتیله

سن هئی ی ی…

تورکجه میزین قووغالی باشی

دونیانین دوغما قارداشی

باش گؤتوروب هارایا گئدیرسه ن بئله دیک - دیک

اؤزوندن باشقا هارانی تانیرسان

باش آچمیش باهاریمیزی کیم باشارار

کیم ائده بیله ر اونا یيیه لیک
شیرین دیللیم!

هانسی سئوگیلی گؤروشه چاغیرمیش سنی

بلکه باشقا یئرده اؤزونه مٶحتاج گؤرورسه ن وطنی
بالام هئی ی ی …

هارایا گئدیرسه ن

قیویریق روحونون آلتینا آلیب ائللری، دیللندیریرسه ن

آخی سن، آخی سن… آی گولوم

سنین آخشاملاریندیر

بوراسی سنین آلانلاریندیر…

نییه گئدیرسه ن؟

من عاشیق

نئچه بوداق یول اولورسان

نئچه یول یوللانیرسان

یئنه باشقا مئیدان می اوخورسان؟

نئچه میدان، نئچه مئیدان اوخونورسان

بونجا مئیدانلاری نئجه اوخوتدورورسان

بوزقیرلیغا قاپی آسان سن

کیمسه سیزلیک چاتلاغینا بایاتی - بایاتی آسیلان سن

بو قارنی آج خيیاوانلارا

عزیزینه م… بو قارنی آج خيیاوانلارا

تورکجه نی دیمدیکله یه ن، یئنه سن

آنا دیلیندن بیر قارین

بیرجه قارین دوغماغا یئریکله یه ن بیر ده سن

عزیزینه م بیر ده سن…
یئری یئری ایپ توخو

ایپک تئلدن ایپ توخو

قوی بوینوما آسیلسین

یار کامانی، یار اوخو
سنی سندن باشقا کیم باشارار

تورکجه میزین قووغالی باشی

دونیانین دوغما قارداشی… !

28.10.138418Yanvar 2006

ايشيـق
‌
بلكه‌ بيرجه‌ شام‌ (شمع‌) ايشيغي‌
تلاطوملو‌ بير گئجه ‌ده‌
قيسيرلانميش‌ اويخولاري‌
اويالداجاق‌ بيردن‌ بيره‌
اوندا گونش‌، گمى‌سي‌ ايله‌
گله‌جكدير گونوزلرين‌ ساحيلينه‌...
خيياولي نيگار
------------------

آرزولار ائلي

هئي...!
آرزولارين ائللييي! آرزولارين ائللييي!
من آرزولار ائلينه
گلين اولماق ايسته ديم

اوزاقلاردا
اوزاق- اوزاق زيروه لرده
يووالانماق ايسته دي توراجيم
اوچار قانادينا داش باغلاندي
آغير- آغير

داغا سؤيكه نمك ايسته دي
دومان- چيسكين، پرده- پرده قاتيلاشدي

اوجالدان قانادلار
اوچجوردان آرزولار
دووارلي ائللرين
عدالتسيز بوجاقلاريندا
يارالاندي
كورلاندي.

یازان: نگار خياوي

گؤنده رن: Redaktor webmaster@gajil.20m.com

٢١ آذر

چؤللره دوشموشه م؛ هاوا گليب باشيما آي ائللر!
دئمه يين هاوامي ايتيرميشه م؛ گولمه يين منه

گونلرين بير گونو گلدي بير كيشي
جان جان دئييب
باشلاديق آغير بير ايشي
او گوندن بري ٥٨ يول دارا چكيلديك
ايليم ايليم ايتيليب٬ سورگون سورولدوك

دئمه يين هاوامي ايتيرميشه م؛ گولمه يين منه
بير گون گلين كؤچوردوم
او گونه دك ٣٣ يول واغزاليني دارا چكميشديلر
آتام باربار باغيردي
آغ گرده ييمه قارادان اؤرپك سالدي
دئدي : «واغزاليسيز گلين كؤچمه ز
بو توي٬ بو دويون آخير بره بيتيرمه ز
منيم قيزيم هاواسيني ايتيرمه ز»

قينامايين آي ائللر؛ گولمه يين منه
دئمه يين اؤزومو ايتيرميشه م
اؤزومدن اؤزوم كوسموشه م

بو مويدو آتامين خئير دوعاسي منه
بو مويدو ائل بولاغيندان سرين سولارين شيرين شيرين آخماسي منه؟

اينانديرين مني آي ائللر؛ اينانديرين
بئله دولانديرين مني آي ائللر؛ دولانديرين

سيز قولو باغلي قوللار…
يهه رسيز آتلارا اوتوران قيزلار؛ اوغوللار
سيزمي دئييلدينيز ياللي گئتدينيز؟
ياشيل دره لري سيخيب؛ اولو داغلاري آشدينيز
سيوري قايالاري ياريب دلي دنيزلردن داشدينيز
دوغان قيزلاري بيزه گلين گتيره ن سيزمي دئييلدينيز؟
ار اوغلانلاري آرماغان گتيره ن سيمي دئيليدينيز؟

گؤزومون تيتره يه ن ياشلاري؛
اته ييمين اسه ن گوللري
ائعدام عسكرلرينين چكمه لرينده دالغالاندي
اللرين توموب مات قالدي
اوره ييمه قان دامدي؛ سوسوز ديليم ياندي
٥٨ يول ساچيمي هؤردوم آچيلدي
هؤردوم آچيلدي
يئنه هؤردوم…
ائعدام مئيدانلارينا ايته له نه ن ايگيدلر گؤردوم

آمما بو گئجه …
بو گئجه گلينلر گرده كلرده گؤزله يير…
قيرميزي دوواقلاردا گيزله نه ن واغزاليني گؤزله يير..

بوگون دوغان كؤرپه لر
وطن آدلي بير يئري كسيله ن گؤبكلرينده سيزلايير…
اوي … كؤرپه لر سيزلايير.

بو آرخايينليغا اينانامام

بو آرخايينليغا اينانامام، اينانامام!

آرخامدا کولک اسير.

کولک اسير آرخامدا، کول سووورور،

ساچلاريم گيزلی بير هيچقيريقین داراغيندا

دن - دن تؤکولور.

باشيمين آغريسی قاپينين جفته سينی آغيرلادير،

قاپی آچيلمير، آچيلمير قاپی،

آچيليبسا،

اؤنونده ديوار دورور

من بو ساری آرخايينليغا اينانميرام.
*
اه بوراخ، بوراخ سؤز سوسله مه یی!

قوی دردلی - دردلی اوغوناق.

دئيينيب - دئيينيب

گولمکدن قيريلاق.

بو دا بير جوره کئف ايله ن ديغلاماقدی

بو دا ياشامين او بيريسيدی.

İlqar

And olsun gözlərinə,
öpsəndə gözlərimdən
ayrılmaram səndən!
Ən gizlin baxışlarını baxsanda
şerini başıma ləçək-ləçək yağsanda...
gözlərimdən öpsəndə,
öpməsəndə
ayrılmaram səndən...!

Arxayınlıq

Bu arxayınlığa inanamam, inanamam!
Arxamda külək əsir
Külək əsir arxamda, kül sovurur
Saçlarım gizli bir hıçqırığın darağında
Dən-dən tökülür
Başımın ağrısı qağının cəftəsini ağırladır
Qapı açılmır, açılmır qapı
Açılıbsa,
Önündə divar durur
Mən bu sarı arxayınlığa inanamam!

Yaşam

Əh burax, burax söz süsləməyi!
Qoy dərdli-dərdli oğunaq!
Deyinib-deyinib
Gülməkdən qırılaq
Bu da bir cürə kef ilən dığlamaqdı!
Bu da yaşamın o birisidi!

آردي-Ardı

فريبا ابراهيمي-آفاق

آنا ديليم

سنله ياشاييرام، سنينله وارام
ۆ حيات پئيكريمه، گؤز آنا ديليم
ۆ سنسه ن اسكي گونوم، گله جه ييم ده
ۆ يابانجي سؤزلره، دوز٬ آنا ديليم
ۆ
حيات اينجه لييين، گول بوداغيندا
شيرين نغمه لري، يار دوداغيندا
شئعير چيچكلرين، موغام باغيندا
سؤيله سه ن سئويملي سؤز٬ آنا ديليم

يالتاقليق قوخوسو، سنه چاتماسين
قارشي چيخ ياساغا، حاققين باتماسين
ائله آرخالان كي، سني آتماسين
صنعت درياسيندا، اوز آنا ديليم

سمادان گئنيشسه ن، دنيزدن درين
گاهدان آتش كيمي، گاهدان دا سرين
يوكسه لير سنينله ايگيدين، ارين
بير گون قور ائده جك كؤز، آناديليم

كور اولسون خور باخان گؤزلري سنه
دوشمه سين وارليغين دومانا- چنه
سئوگيليم بيرليكده دئيه ك وطنه
ياشاسين ائل اوبام، اؤز آنا ديليم

سؤيله درديميزي، تاپ درمانين دا
گووه نه ك قوي سنه، ائللر يانيندا
قورقود دده ميزين دئنه ن شانيندا
آشيقلار سازيندا، سؤز آنا ديليم

عصيرلردن باشدا بيزه ساري باخ
دوستلاري سئويندير، دوشمنلري ياخ
آفاق`ا ياييليب زنگينلييين باخ
اينجيلر ميصراعدا، دوز آنا ديليم

یازان: فريبا ابراهيمي (آفاق)

آردي-Ardı